熱門:

2015年12月14日

高仁 財圈識真假

探索新股上市另類動機

上文提要:高仁與私募基金(Private Equity,PE)的GP(General Partner)Ken陳久別重逢,再相約在蘭桂坊Kyoto Joe見面,探討了PE投資Pre-IPO公司(準新股)再難戴「頭盔」的原因。

由於高仁與Ken陳就IPO的問題傾得特別投契,大家好似有說之不盡的話題一樣,所以便繼續探索了新股上市的另類動機。

Ken陳:話時話,呢間Kyoto Joe真係好似做咗好耐咁喎!

勝過私人賣盤

高仁:佢喺「老蘭」(蘭桂坊)中算係開業較早嘅高級日本餐廳。

Ken陳:嘩!有咁耐歷史嘅餐廳,真係唔講得笑。

高仁:但係,有時候做生意嘅嘢,承傳係一個好大問題喎。我打一個譬喻,有一家公司創辦人因年紀老邁想退休,佢班仔女唔想接手打理盤生意,佢可以點做呢?

Ken陳:佢可以轉讓私人公司方式出售盤生意,但盤生意就比較難做到宣傳之餘,而且得出嚟估值會相對較低。

高仁:其實,呢盤生意係佢嘅「心血」嚟,佢唔想全盤賤賣畀街外人。究竟有乜嘢兩全其美嘅方法,既可以增加估值之餘,又可以有免費宣傳呢?

Ken陳:IPO?

高仁:Bingo!佢將盤生意搞上市,趁公開發售出售舊股套現,其餘股份就作為自己保留。當機會來臨嘅時候,佢可以出售部分業務或股份畀投資者,只保留部分股權作為被動投資。

Ken陳:呢個方法又幾靈活喎。

高仁:點止呀!?除咗股份同業務可以出售之外,甚至連殼都可以賣埋,大賺一筆。以一隻新股上市使費大約5000萬元(主要視乎公司規模而定)、主板殼價值4億至5億元計,回報隨時高達10倍!

Ken陳:仲有,上市可以提高公司知名度,不排除可以增加創辦人仔女對公司嘅興趣,回心轉意肯去接班。

高仁:即使創辦人仔女冇興趣接班,上市公司會較容易吸引專業人士加入,專業人士幫手去run盤生意,或者會做得比之前更好。

Ken陳:如果創辦人盤生意走下坡呢?

高仁:問題都唔大嘅,殼股有市嘛,只要殼價保持穩定嘅話,創辦人始終有jetso。其他jetso包括,董事薪酬福利比較穩定,每月定時定候有糧出,唔使睇賺定蝕;如果有自置物業租畀上市公司仲正,每月可以準時收租,自己兼享升值潛力。

Ken陳:我仲知道,只要公司上市之後,銀行一般都會另眼相看,比較樂意向大股東提供貸款。

分身家都易啲

高仁:由於上市公司比較透明,資產流動性亦較高,如果創辦人仔女多嘅話,分身家都易搞啲。

Ken陳:高仁,你咁都諗到,真係勁!

高仁:梗係啦!如果上市唔係有咁多另類好處,邊會有咁多公司爭住上市喎。

Ken陳:時間都唔早嘞,不如我哋埋單走人。

高仁:等一陣,咪走住。我本新書《高仁財技──投資自由行》【圖】剛剛新鮮滾熱辣印起,預計今個禮拜會喺書局正式發售,而家送一本畀你先睹為快。

Ken陳:嘩,正喎!我一定會叫齊班朋友買書「十卜」(support)你。

高仁:多謝捧場。

Ken陳:哈哈!我今次仲唔係又食又拎。

本欄逢周一刊出

歡迎交流上市公司的財技個案及招數,請電郵至[email protected]

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads