熱門:

2015年9月30日

方卓如 方如玉帥

你仲舒服過首富

大市在期指結算日大跌700多點,你以後可以毋須理會嗰啲「淡友長假期前收兵過節」、「季結前基金會推高股價」、「結算時大市較為波動」,句句都互相排斥,啱又得錯又得,毫無預測功能。但係而家問題唔係預測得啱定唔啱,而係你有冇做啱動作嘅能力。

好多人都見到大市未跌完,二萬點一定會穿,咁你會點做?沽期指?買put沽call?分段撈底?乜都唔做揸cash?全部係考驗你智慧膽識同耐性。做啱都未夠,太早做啱忍唔到尾都要輸。我一早講過,你技術唔夠嘅,而家最好乜都唔做擰轉面,不過唔係咁多人忍到手。

買股票其實係僅次於買樓嘅史上最大洗腦工程。買樓過世係香港人畢生追求嘅終極目標,畀500呎困住自己嘅青春都在所不辭。

買股票養老就係香港人不言而喻嘅共識,靠自己份糧使剩嘅積蓄冇可能食到瓜老襯,況且而家好後生就隨時冇咗份工,但仲要捱好鬼耐先到死嗰日,加上而家啲細路自己搵都未夠自己食,唔使旨意養番你轉頭。買股票,投資致富,就係大家公認退休享受人生嘅唯一方法。有咗呢個概念入腦,就好Inception套戲一樣,點抹都抹唔甩。

所以話,股市係唔會長時間一池死水,佢同樓市一樣,都有剛性需求。問題係,佢要消除晒所有下跌預期先得。就等於通縮,賤物鬥窮人,個個覺得下次買會再平啲,個個都封實荷包,價錢自然螺旋下跌。而家股市氣氛咁差,就係等終極大屠殺一跌。

首富終於要正正經經回應對佢嘅文章指摘,內容係乜並唔重要,咁多時間一定寫到一篇得體堂皇嘅回應,重點係點解要回應。對首富嘅指摘,咁多年嚟冇一萬都有幾千,首富都唔見得放在心上。今次對一篇已經由阿爺回應咗嘅疑似阿爺文章咁認真,以首富嘅眼光同人脈,證明佢都唔敢怠慢,應對方法不容半點差池。我講過,你要記得自己生存喺乜嘢世界。呢個世界,只想買樓過世同買股退休嘅你,其實生存得舒服輕鬆過首富。連首富都要打醒十二分精神去生存,你供緊樓輸緊股票,濕濕碎咋。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads