2015年9月7日
人類最大發明,除咗粥粉麵飯係公認之外,其他就各有所好。李光耀話係冷氣,有人話係抽水馬桶,而我就話,一定係iPhone。冇咗佢,什麼4G、3G完全冇用。iPhone出現,生活可以豐富得多。以前你去日本旅行,腦入面只有車站同車站,城市嘅上下左右分布係冇概念。而家,你可以邊行邊用Google map將唔同地方駁埋,真正認識城市。從此你永遠唔會蕩失路,睇住手機map教你行。去到啲歐洲城市,見到個教堂,上網睇吓背景資料,即刻變咗深度旅遊,唔只淨係睇個殼。喺香港你已經唔可以冇手機,出埠更加要叉足電,分分鐘上網。
iPhone幫人閱讀得更多,至少我係。我有長文閱讀困難症,見到一篇密密麻麻大段字,我無法集中看下去。後來發現未必是我問題,世上的確廢字太多,好難叫人花時間逐字讀下去。用iPhone睇《金融時報》、《經濟學人》,只集中一段一段字往下掃,容易讀得快、看得完。知識未必有增長,資訊肯定吸收爆棚。
「求不得」令人唔開心
講咁耐,都係想講《金融時報》一篇文章,叫做《最後定案:金錢買到快樂》,將社會要灌輸畀你嘅概念打破。我近年對錢嘅研究多咗,近距離見過多咗客觀地的確有錢嘅人。有人話有錢人好難界定,儍嘅,你咁講證明你對錢冇概念。錢其實係紙一張,係張換領券,你唔用嚟換取資源服務,同張廁紙冇分別。你有足夠能力,隨時換取你要嘅資源服務,咁就係有錢。唔使要買私人飛機嘅,就算你有,都飛唔到你去Serengeti,都唔到你惡晒,有同冇都冇分別。
錢係可以買到消除冇錢令你嘅不快,淨係咁已經令你開心晒。人其實無時無刻都可以好快樂,只係周不時有種「求不得」嘅感覺隱隱令你好唔開心、好唔舒服。當你覺得要乜都得,你反而唔強求咁多,簡簡單單,去做啲令你開心嘅事。要乜有乜嘅感覺係相對嘅,你提升唔到你嘅財富,咪降低你嘅欲求囉。所以,一係你就夠晒邪惡狂搵錢,一係你就立地成佛收心養性,兩樣都會令你開心。不過,你唔講我都知你揀邊樣。睇得呢份報紙,你應該幾邪惡。
訂戶登入
下一篇: | 二不離三下試低位殺牛 |
上一篇: | 滬港通一周統計 |