熱門:

2015年8月19日

麥狄文 金融街密語

股東爭拗累事又一例子

近期港股表現如何,唔使阿Man多講,自上個月發生「708」股災之後,港股已步入喪屍狀態,只要外來有些少風吹草動,就盲目向下插水,而無事無幹嘅時候,就靜如一潭死水。大市咁嘅死款,鮮有股份可以獨自跑出,除非不斷以銀彈攻勢博命掃貨,否則幾好消息,亦唔能夠喺股價表現反映出嚟。

好似科瑞控股(08109)喺上個月公布咗一個利好消息,該公司宣布向韓國娛樂製作公司,收購Marvel復仇者聯盟展覽館及主題公園在大中華地區的經營權。該公司表示會喺香港搵地方,估計好大機會喺郵輪碼頭,即係卡通電影人物復仇者聯盟展覽館及主題公園將會喺香港落地,呢個會係韓國及紐約以外全球第三個。

出好消息 科瑞不升反跌

照道理呢個係好消息,因為成功興建主題公園可為科瑞帶嚟穩定收入,而且Marvel呢幾年所推出嘅電影都賣個滿堂紅,主題公園同展覽館肯定受市場歡迎。照計呢個消息一出,科瑞股價應該可以炒到出煙,相反其股價喺消息公布後,非但未受刺激上升,反而一復牌股價急挫逾三成。有人歸咎於上個月係股災月,就算出乜利好消息股價都難以飛天,即使市場氣氛有影響,股價亦未至於要插水。果然阿Man同知情人士八多幾句,呢單嘢確係別有內情。

睇番該公司曾於4月以5040萬元收購咗一間叫Red Rabbit Technology公司七成股權,Red Rabbit Technology本身係一間提供網上遊戲平台、軟件應用程式及解決方案嘅菲律賓公司,Red Rabbit亦與一間擁有網上娛樂場牌照的Serengeti Management Limited簽訂獨家經營協議,換言之,即係喺菲律賓有經營網上賭場。呢單交易明眼人一睇,又係以收購項目變相賣殼嘅故仔,通常呢類交易,唔會一次過完成交收,即係新舊股東將會同一時間出現喺公司。

新舊股東唔多啱傾

聽聞該公司自4月開始公布呢單交易後,新舊股東唔多啱傾,交接過程諸多阻滯,聽講中間鬧過唔少不愉快事件。所謂家和萬事興,家衰口不停,套用於上市公司道理一樣。

每當有人事爭拗,公司做乜都唔暢順,股價亦好難有理想表現。不過睇睇公司近一個月嘅人事變動,問題應該解決咗,新股東正式全權接手,仲坐正入公司擔大旗,新人事新作風,又即管睇吓公司會唔會有一番新景象。

本欄逢周三刊登

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads