熱門:

2015年8月18日

方卓如 方如玉帥

耳聽投資法

學生有放暑假,大人都應該有。意大利直情成個國家停頓晒,你要訂任何意大利人做嘅配件,唔該等足一個月。你炒股票嘅都應該放吓暑假,唔使日日都睇冧巴嘅。

放暑假最好係整理吓自己嘅思考方法,總結吓大時代你嘅表現,檢討吓何解自己會賺得唔夠盡甚至蝕本,建立一套適合自己性格同強項嘅投資方法同思考模式,咁你先有穩定嘅投資表現,唔會贏粒糖輸間廠。

只聽叻人推介股份

旁觀者清,我自己就冇糖又冇廠,但係最叻幫人斷症,話畀人知佢哋最啱乜嘢思考模式。岸信介係我老友之一,佢喺早前嘅大時代贏咗唔少。我啲師傅梗係個個猛料,但其實我啲老友都各有精采。岸信介有呢個名,唔係因為佢似安倍晉三嘅外公,係因為佢上咗岸唔在講,佢買股票主要就係信晒人哋介紹,人哋話邊隻掂就買邊隻。唔好以為聽人講亂咁買,輸死都未天光,岸信介有本事上得岸,點會係蠢人?佢揀啲叻過佢,有錢過佢嘅人嚟聽,唔係飲茶嘅時候豎起耳仔偷聽。

如果你識嘢嘅,應該會即刻諗到:「嘩,聽啲叻過你,有錢過你嘅人講?你老竇唔剩番十副身家畀你,睇怕都唔夠你輸」。算你有料,知道最毒嘅料唔係啲師奶可以袋喺袋過畀你,貓仔點惡最多都係抓損你,獅子先有本事一啖食你落肚。岸信介冇畀人食落肚,好大原因係佢識揀人嚟聽,揀啲唔會點佢嘅人嚟聽。人哋教你分散投資,唔好將啲雞蛋擺晒落一個籃度,岸信介就唔會信晒一個人講買晒落去;人哋睇公司質素落注,佢就聽人講嘢嘅前科嚟落注。講中居多嘅,佢買多啲;信唔過嘅,聽完就算。呢種用耳仔嘅投資方法,大時代嗰四個月贏晒。

岸信介最大嘅罩門,正是有錢人嘅弊病,愈有錢愈貪。本來賺一球好開心,賺到第五個一球,一球變咗起錶。貪咗嘅代價,係你唔願意太早沽貨走人。岸信介目前計數依然贏,但係贏少好多,同坐咗好多貨。坐坐吓,由贏變輸,好易唔再聽人講,到時候呢招耳聽投資法,對岸信介嚟講就會失靈。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads