熱門:

2015年8月12日

方卓如 方如玉帥

超值股都狙擊

中國終於用到貨幣貶值呢招。基本上全世界貨幣對美元都貶值,人民幣跟隨之後,全亞洲只有香港貨幣最強。如果美國今年真係加息,香港焗跟,97、98年嘅情境,你將會再一次遇上。分別係,當年中國將人民幣升值,令亞洲國家可以唞氣等復甦。而家連人民幣都貶值,香港就係孤零零一個。貨幣沒有貶值,惟有資產貶值。貨幣咁強,要套現一定揀香港資產來套,因為港紙值錢。人民幣貶值係對香港最大嘅傷害,所以朝早升完400點,下晝即刻跌番轉頭。昨日恐怕已經係大跌市前的最後一彈,未來一路向下。

市盈率低 屈賬目問題浮面

沽空機構又出擊,狙擊市盈率得5倍嘅電訊器材股。5倍市盈率,已經平到你唔信,仲要追殺,其實係易過市盈率幾百倍,甚至冇市盈率。點解?幾百倍市盈率,買得嘅人都唔care佢有冇盈利,毋須賬目做假,你點追殺佢?冇市盈率,本來無一物,何處惹狙擊?

單位數市盈率,你可以屈佢係賬目問題已經浮上水面,無人敢買,所以市盈率咁低。而且沽空機構,講過就係,都唔需要詳細證據,總可以令你股價跌,停牌都阻唔到佢哋場外補貨,基本上贏梗。所以你要注意,下一輪沽空狙擊對象,唔一定係炒到飛天嘅虧損股,隨時係價值投資法覺得抵買嘅超值股,問你死未?

Uber在全世界都有敵人,全世界政府都諗緊究竟點樣合法處理Uber,只有香港最快手,真係上門拉人。究竟係香港法例寫得清楚,毫無灰色地帶,定係香港拉人本來就唔使點理法例,總有辦法捉到你?是否「不誠實使用電腦」已經足夠封殺Uber?其實香港公共交通係全世界最方便,搭乜都可以任你揀,又平又正,Uber正路應該係冇生存空間。佢可以係香港做得起,全靠的士冚旗揀客,都已經唔係秘密。

犯法拒載嘅的士要政府封殺仲未知係咪犯法嘅Uber,未肯定犯法嘅拉先,明知犯法嘅,每星期喺雲咸街警察面前掂行掂過,吹咩?都係嗰句,認真便輸了。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads