2015年7月17日
7月16日,周四。
老徐:「以為個市跌得七七八八,上個禮拜自作聰明入咗幾手齊普拉斯(虛擬公司名稱)。勢估唔到,隻嘢仲唔生性過希臘總理,話咁快唔見兩成。坐晒艇,Joe哥,點算?」
Joe:「溝淡。」
老徐:「鬼唔知咩,年頭廿蚊買齊普拉斯,博公司換咗舵手有一番新氣象,殊不知衰多幾錢。溝淡?大大話話做咗四五次啦,再咁落去,齊普拉斯未玩完,老子已洗袋。照情形睇,索性冇眼屎乾淨盲,乜都唔理乜都唔做,疊埋心水同齊普拉斯鬥長命仲划算。」
Joe:「鬥長命?老徐呀老徐,你今年貴庚?人家才四十出頭,閣下憑什麼?啊,不好意思,小弟轉數慢,一時省唔起你講嘅齊普拉斯係一間上市公司。不過,鬥長命這主意不錯。難得閣下咁睇得開,老徐,今餐你嘅!」
愈溝愈淡vs愈溝愈杰
虛擬世界中的齊普拉斯,股價愈買愈跌,等它翻身,分分鐘要搏長條命。然而,話得說回頭,溝淡溝淡愈溝愈淡,成手蟹貨一件事,平均投資成本確會因此給拉低。
現實世界中的齊普拉斯卻並非如此,希臘每次衰到貼地,連息都還唔起,債權人便向這個無底深潭注資,成本一次高過一次。與老徐一樣,歐盟日盼夜盼齊普拉斯知恥近乎勇,的起心肝發奮圖強,擺脫長期靠人連累街坊的宿命。可是,老徐溝貨愈溝愈淡,歐盟溝貨卻愈溝愈杰。老徐可以眼不見心不煩,溝到火滾一聲唔再double down,踢隻衰股落床下底,看誰命硬便是;歐盟卻明知是氹也要不斷填,次次公告天下拒絕再玩,卻次次都在逼得希臘讓步後double down。
執筆時,希臘國會已通過多項緊縮改革法案,為五年來第三輪救助鋪平道路。譖氣都要講句,賭公投結果輸了的弟兄姊妹,揼心口揼到依家。希臘民眾十天前vote No,全世界聽得一清二楚;該國民意代表如今拐個彎大比數vote Yes,民意何價?
看齊普拉斯在國會hard sell超緊縮方案那副滔滔不絕口若懸河的模樣,真想問他一句:「Mr. Tspiras, who are you?」雖說政客講嘢信三成都死,但出得嚟行總要講幾分公信力,短短十天便徹底打倒昨日的我,試問大批希臘群眾上街,抗議的是債權人的不仁不義,抑或民選總理的出爾反爾?
羞辱對手舉世無雙
德國「女王」眾目睽睽剝齊普拉斯光豬,只怕連默克爾自己也料不到對方答應得那麼口爽。說到不留顏面羞辱對手,德國認了第二,恐怕無人敢認第一。去年世界盃準決賽,德軍不是當着全球上億觀眾面前,7比1剝森巴兵團光豬嗎?
在「女王」面前,齊普拉斯就像巴西前鋒費特(Frederico Chaves Guedes),面對德軍防線「一棟都冇」,失球後全軍士氣崩瀉,落得個兵敗如山倒。然而,老畢就是不明,輸得如此難看已夠慘,何以球迷總是不放過費特這個攻擊球員?換了其他國家隊,七個一皮丟人現眼,揹黑鍋的不是懶追波行行企企的後衞,便是企錯位任射唔嬲的龍門。球隊慘吞七蛋,罵聲盡歸前鋒,捨巴西其誰?
細看希臘的緊縮方案,連整餅做麵包這等行業也提上改革日程,可見十天前振臂高呼、號召人民「為國爭光」的齊普拉斯,為怕再被關進「女王的教室」,緊縮處連最細微細眼的環節亦不放過。巴西輸波賴費特,還可說冤哉枉也;齊普拉斯這個「最樣衰的型男」被指出賣國民,搵鬼可憐矣。
最大輸家貨幣聯盟
希臘國會通過改革方案後,歐股全線上揚,惟歐羅不升反跌,執筆一刻連1.09美元亦告失守。德國對希臘這一役,齊普拉斯固然醜態百出猶如政治小丑,但默克爾這個盛氣凌人的「女王」,同樣贏不到掌聲。然而,真正的輸家不是「溝淡」齊普拉斯卻食得鹹魚抵得渴的老徐,而是早知今日何必當初的貨幣聯盟。
放大圖片 / 顯示原圖訂戶登入
下一篇: | 挨完一巴又一巴 |
上一篇: | 香港股市上日收市統計 |