2015年7月15日
相信呢個星期缸邊友茶餘飯後嘅話題,都離唔開上星期中港兩地股市股災,仲要係由阿爺暴力救市引發災上加災,港股慘成內地莊家同中國大媽嘅提款機,無辜辜跌幾千點,更甚係唔少股仔被瘋狂斬倉,喺要錢唔要貨嘅情況下,跌幅較高位閒閒地五六成。
咁究竟呢個浪裏頭誰是贏家,誰是輸家呢?缸邊友眾說紛紜,話無論本地薑定係強國莊家肯定係大贏家,皆因唔少股仔炒高幾個開,即使較高位殺咗五六成,甚至七八成,班莊家仍然贏大鑊,但阿Man收風事實跟傳聞有些少出入。話說強國莊家嚟港股炒股仔確係炒到出神入化,個別股份確錄得以倍數計升幅,不過十居其九係紙上富貴,事關呢啲股通常交投較為疏落,要套現唔係咁容易。
至於成交活躍嘅股仔,通常升幅唔會超過兩倍,莊家無錯有機會喺高位派貨,而部分莊家亦順利套現,但呢類股份通常已於股災期間跌突之前升幅,更過分者係連起步位都守唔住。喺呢幾日反彈浪中,呢類股仔即使有反彈,現價仍較高位低四五成,甚至一半有多,亦唔見得莊家從中獲得豐厚利潤。
資金鏈斷層難甩身
至於部分強國莊家仲大鑊,不但喺港股呢邊慘淡逃生,喺A股市場更難逃被套牢命運,喺港股提款機一攞完錢,轉頭就要抬番A股補倉填氹。
至於冇參與A股嘅本地薑莊家,亦有出現狼狽例子,聞說有個呢兩年冒起嘅新晉本地薑,呢兩年大出風頭,唔單止點石成金,炒邊隻升邊隻,仲威猛到踩埋媒體嗰瓣,大灑金錢搞埋炒股書仔,成功吸引唔少缸邊友入佢啲場玩,呢一個浪撈到盤滿缽滿。可惜,呢位仁兄犯咗一個低級錯誤,就係同時開得太多條戰線,結果喺股災期間手持嘅貨被其他玩家瘋狂斬倉,貨值大跌孖展額亦縮水,就算冇搞到穿窿填氹,呢鑊咪話唔頭痕。
持貨價值縮水,孖展額又被收緊,即係資金鏈出現斷層,手持嘅貨如果要疏散,點都要子彈打成交砌高股價,方能吸引缸邊友同炒鬼再入場。偏偏呢個時候流動資金緊絀,頂得住唔使被迫斬倉已謝天謝地,再重整旗鼓有排搞,呢鋪不但要再坐一會,要甩身真係談何容易。
當然亦有醒目莊家安然度過今次股災,除咗要銀彈充足,另一個致勝之道就係同時唔可以開太多火頭。
不過,就算經驗老到嘅本地薑,亦表示股仔至少三五七個月碰不得,無他嘅,一來魚缸水靜鵝飛,踏入呢個星期已見港股成交愈玩愈縮,二來高位派咗貨,再收貨要至少要半年,明知吸引唔到缸邊友入場,喺反彈浪裏再花子彈亦係白費功夫,與其事倍功半,倒不如休養生息,等待下一個大時代。
本欄逢周三刊登
訂戶登入
下一篇: | 成交萎縮 反彈力度減弱 |
上一篇: | 反彈值博率降 |