2015年7月9日
港股成為影子A股,A股巧妙地半停市,冇阿爺祝福嘅自我停牌,變身良心公司,從香港1987年嘅經驗,一復牌又會再跌,加上跌停牌機制,唔可以一步跌到位,更加跌唔停,愈跌愈有。你睇港股,任你跌,昨日早上只有唔夠20隻股票有得升。到下午,有股票跌到殘之後反彈。市場是冷血的,唔識恐懼,人先至係又貪又驚嗰個。打開門口任你沽,反而啲人先唔敢沽得太狠,先有人心思思要入場撈底。
如何對付一個泡沫爆破?就係製造另一個更大泡沫。我哋呢一代人就係生活喺唔同泡沫之中,同最後泡沫鬥短命。A股唔跌得係因為佢就係最後泡沫,連股票都玩完,仲有乜嘢資產可以價格上升帶動經濟?阿爺一啲都唔含蓄,出口出手要買起個市,正路應該係全民興奮,跟買,一齊做世界。但係實情相反,證明連最貪心嘅股民,而家都唔敢貪。地球上賭性最強嘅民族,而家都覺得博唔過。
現在要(目及)實熟悉股票
A股唔沽得,港股變咗對沖機器,惟有沽港股。但係A股市場已經扭曲咗,價錢完全反映唔到實況,用港股對沖隨時會沽過龍。
A股國際化、市場化嘅進程會因為這次「暴力救市」而倒退幾年,有排唔使旨意入到MSCI,有排都唔係基金要追貨嘅對象。咁即係港股嘅價值又可以延長幾年,只要唔好自我A股化。
香港最值得投資嘅係乜嘢股票?就係兩面極端,有穩定盈利增長兼保持派息嘅好股票,同長期蝕到阿媽都唔認得,大股東無心戀戰嘅渣股票。前者買嚟保本收息,後者博佢賣殼。A股隨時可以叫停IPO,香港嘅殼股唔單止唔會因股災冧價,反而會因為股災而更加硬淨。
空手去接跌落嚟嘅飛刀會損手爛腳,但慢慢執佢跌咗落地嘅飛刀,你先至有武器刀仔鋸大樹。人哋驚你就要貪,而家要(目及)實你最熟悉嘅股票,睇實佢而家乜嘢價。
訂戶登入
下一篇: | 2015變先高後低 後市麻煩 |
上一篇: | 滬港通上日收市統計 |