2015年6月29日
A股有跌停板機制都跌超過8%,已經係一次小股災。斬孖展嘅殺傷力係可以好勁好耐,因為孖展客係完全冇坐貨嘅能力,唔畀人斬倉,自己都會嚇到要沽。借到盡嘅股市,唔一定升得勁,但一定跌得狠。
一早講咗阿爺要好好利用股市嘅目的未完成,係唔會畀佢牛市玩完嘅。而家又減息又降準,話晒你知佢唔想牛市玩完。
但係全世界都望到中國嘅牛市同美國唔同。中國唔單止散戶多,孖展投機客仲多,佢哋抱住有今生冇來世嘅心態,同你博一鋪,贏嘅就一世,輸嘅就大半世。佢哋都唔使問買咗乜嘢,只要買嗰隻有得升,咁就得喇。
美國唔會咁同你買,佢哋會睇過買乜,乜嘢價錢買。機構投資者大把錢,唔係借孖展,唔會有乜咿喐就收兵走人,唔會一下子被震走斬倉。有呢類質素嘅投資者,政府放水催谷股市先有效果。
阿爺用股市救經濟嘅目標好明確, 但係未救到經濟前,先益咗一批炒家,殺咗一批投機孖展客,最慘係嚇窒了一批小市民,諗住趁市旺用小小私己錢玩一鋪。呢班小市民先係股市救經濟嘅主角,要籌錢,要以股代債,就係要民間儲落嘅資金從股票流入公司,流畀阿爺。
辛苦搭棚嘥心機
嚇窒咗小市民,之前咁辛苦搭起嘅棚白費心機,小市民唔再信任股市,唔買股票,咁就真係牛市玩完。
好快就知減息降準有冇用,A股可能冇反應,但港股一定彈起。阿爺用股市救經濟,港股都有份。港股冇A股咁癲,未有股災,兼且唔使好多錢就炒得起。港股還有國際資金,唔係塘水滾塘魚。A股就算玩完,港股仲未。
只要你信阿爺用股市救經濟一日未成,港股一日都仲未玩完。
訂戶登入
下一篇: | 央媽救市 好消息造淡 |
上一篇: | 天安成交異動 短期睇5.5元 |