熱門:

2015年6月17日

麥狄文 金融街密語

殼主話嫁又唔嫁

自舊年開始,賣殼尋寶遊戲日日上演,而有幸泊到個大碼頭,搵到大孖沙買家嘅股仔當然大飛天,好似畀阿里爸爸睇中嘅,閒閒地升幾個開,難怪全城炒家對呢個遊戲樂此不疲。

「齋吹」照炒

當然,新殼主手瓜夠硬,賣完殼就炒到出煙;但唔少殼主眼見自己隻殼交收後瘋狂大飛天,唔多唔少有啲心理唔平衡,所以今年買賣殼又玩番分段交收。最普遍例子係印公仔紙,先批一手平貨畀新買家,通常係以擴大後股本計一成,之後就炒高再印再批,直至成隻殼交收完畢,可能股價已翻咗一番,咁殼主有份參與升空過程,心理自然平衡得多。

不過,有個別殼主眼見今年個市加大馬力,尤其二三線股仔炒到甩轆,深怕賣咗個殼畀人會錯過大時代,往往出現話嫁又唔嫁嘅現象。出爾反爾嘅例子唔少,今年最爆嘅莫過於時富金融(00510)。

當全世界以為時富泊到個大碼頭泛海控股,必定可以順利交收走唔甩,誰知埋門一腳股東會竟然反對,成單交易最終拉倒,股東會當日時富股價亦由1元樓上,急跌一半至最低「五粒神」。坊間傳聞時富係認為當日同泛海所擬定嘅交易價格太低,如此賤賣實在對唔住班股東,加上有其他買家接洽,所以拉倒同泛海交易再善價而沽。

話時話,本地券商又確係皇帝女唔憂嫁,時富「悔婚」實在大條道理。時富拉倒之後,阿Man諗緊另一家已簽備忘錄待嫁嘅本地券商會否有樣學樣,至於講緊邊間本地券商,心水清者應心中有數。

時富簽晒備忘錄都可以「悔婚」,更何況口講無憑只係得把口講話有第三者接洽……手袋站曾經表示有第三者洽購控股股東股權,喺市場憧憬一旦賣殼成功又可以炒到甩轆嘅情況下,股價又被炒高。豈料公司發通告話全部嘢都係得個吹字,未有簽訂任何協議,股價喺公布當日未有插水反而再炒高,直至幾日後市場方有滯後反應,急跌後最終打回原形落番八毫幾子。

春江鴨變長頸鹿

聽聞呢單賣殼事件仲騎呢,本來殼主確係有意賣殼套現,誰知傾傾吓愈來愈多缸邊友入場搵食,有見及此,殼主同新買家決定利用話嫁唔嫁呢招短炒番轉,結果係點有目共睹。可憐唔少所謂「春江鴨」上咗車等食糊反而被綁死,再等買賣雙方收番街貨兼講掂數,隨時由春江鴨等到變長頸鹿。

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads