2015年6月10日
踏入6月,雖然日日仲有股仔爆炒,但總括嚟講搵食絕對唔容易,尤其係呢幾日無論市跌市升,下跌股份遠超上升股份,遇上指數跌得三兩百點,下跌股份更閒閒地千幾隻。好似噚日指數插水三百幾點,失守二萬七,至散場上升股份僅剩208隻,要捉得正逆市上升股可以話難過登天。
阿Man就相當好彩,噚日喺盤房來料貼中靄華押業(01319)有得炒,阿Man推測靄華能逆市造好係有跡可尋,絕非單單因為靄華交咗份靚仔成績表兼慷慨送紅股。先睇靄華上周五宣布以每股2.03元配售8000萬股,雖然代理人唔係聲名顯赫嘅一級投行,但係呢間本地薑向來只做高端客戶,大部分客都係有米之人,斗零孖展唔使借,仍可以坐得起一百幾十球貨嘅實力派,有咁高質素客戶支持,每當公司吹雞要批股接貨,只要係優質股,唔慌冇人要。
但據阿Man收風了解,今次搞靄華批股,配售代理班大客反應只係普通,更有客戶揚言批貴過兩蚊雞就睬佢都傻,所以原本只係打算批50球左右。班高端客戶有呢啲反應,跟靄華本身質素無關,主要係過往其股價表現平平,唔講得上係當炒股,而最近二三線股炒風又開始冷卻,客仔寧願少食餐亦唔多願接貨。不過,配售代理又豈會得自己班高端客戶,據聞呢間本地薑老闆喺圈內人際網絡強勁,跟唔少芬佬有偈傾,所以今次靄華批股轉移向呢班機構投資者埋手。
50球貨瞬間掃清
做得基金經理,眼光自然有番咁上下,一問呢班大哥有冇興趣接靄華,反應熱烈嘅程度,連配售代理老闆跟上市公司大股東亦始料不及,50球貨眨吓眼掃清光,為免順得哥情失嫂意,得大股東首肯批股加碼至80球。芬佬鬥搶貨反映靄華現價買得過,加上其市值最近突破咗10億元,過往唔少受限制不能投資市值低於10億中小型股嘅基金,見靄華剛剛夠秤,亦相繼加入搶貨行動。
聽聞超過半數批股由兩個名字響噹噹嘅基金接晒,即係批股盡入強中手。至於無貨喺手嘅散仔,惟有喺街鬥搶,而靄華一向街貨有限,大股東已持貨逾六成,街貨買少見少,難怪其股價喺如此疲弱嘅市況下,批完股仲有本事連升兩日,接咗批股貨嘅基金輕輕鬆鬆坐住兩成幾利潤。所以話幾時都係芬佬獨具慧眼,跌市仍然執到寶。
本欄逢周三刊登
放大圖片 / 顯示原圖訂戶登入
下一篇: | 恒指向淡 本周持續「殺牛」 |
上一篇: | 後市令人憂慮 |