熱門:

2015年6月3日

麥狄文 金融街密語

CFO點只數佬咁簡單

歌手紅唔紅,同唱歌叻唔叻只有間接關係,要大紅大紫成為巨星,主要取決於跟唔跟到金牌經理人。同樣,上市公司基本因素好唔好並唔會完全反映喺股價之上,公司價值能否完全體現於股價及市值上面,絕對需要一個高手去包裝間公司,而呢個角色以往主要靠CEO擔起大旗,向投資者解釋公司業務發展,透過上市平台發揮最大集資功能。

今時唔同往日,近幾年公司CFO益發變得重要,不遜CEO,主要係因為CFO最清楚公司盤數,更加可以透過公司賬目向投資者解釋公司業務發展同商業模式,成為上市公司金牌經理人。咪以為CFO只係負責管住盤數,最重要係搞埋市值管理,做埋公司推廣工作,公司價值要適當地反映於股價上,唔可以任由公司市值偏離實際估值,尤其係被嚴重低估嗰種情況。

創聯教育股價勁升

另一方面,當公司發展業務需要集資時,CFO亦要諗計為公司順利籌得資金,向投資者盡sell公司最好嘅一面。反而有關賬目工作,唔少CFO都交由手下去處理,自己反而擔起公司經理人呢個角色。不過,每間上市公司習慣大有不同,個別公司仍然以CEO去做推廣,CFO依舊係數佬一個咁大把,所以上市公司CFO人工可以話係海鮮價。純粹睇數嘅CFO,人工一個月都係三五七萬,但兼埋公司金牌經理人嘅CFO,年薪動輒過百萬,呢條數仲未計年底分花紅,一個多功能CFO年薪閒閒地幾球,相對公司CEO有過之而無不及。

近期最紅嘅CFO,要數中國創聯教育(02371)嘅CFO宋總Eric。睇番自宋總今年4月份加入創聯之後,創聯股價拾級而上,由兩粒神起步,短短兩個月股價攀升至噚日高位七粒神樓上,股價足足升咗三個開有多,可見星級CFO對一間公司可以起到乜嘢作用。

記得當年宋總喺亞洲果業(00073)嘅時候,曾經令公司成功喺英國掛牌,並吸引大量機構投資者吸納,亞果市值一度升越百億元大關,雖然呢啲輝煌日子俱往矣,但亞果都總算曾經風光過。

如今宋總坐陣創聯,難怪坊間有傳聞公司亦要挑戰百億市值,即係股價要見2元咁厲害。創聯仲有冇本事上百億市值,阿Man不得而知,但宋總成為星級CFO就係不爭嘅事實。

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads