2022年1月24日
過去兩年受新冠疫情困擾,大部分港人沒法出國旅遊或公幹,Bonnie大半年前開始養貓,一養即不能自拔,「我隻貓Lala真係好得意,兩歲幾,人哋唔要佢,我就拎返嚟。(那麼得意都不要?)係囉!個朋友見呢隻得意就買,嗰隻得意又買,愈來愈多養唔掂,加上佢成日唔喺香港,冇時間照顧,就轉送畀我。」
性格喜交際似足主人
養寵物也講緣份,她直言以往未試過,因本身有鼻敏感,之前摸完其他貓後,一不留神用手捽眼,「結果眼角膜腫晒,但唔知點解對住佢(Lala)又冇嘢喎,真係緣份嚟。」
可會考慮再養其他貓?Bonnie稱:「唔會啦,我呢隻好需要attention(關注),每朝準時8點幾就喺我房門口喵喵喵,佢好錫人,我攤喺度佢都會跳上嚟玩,好有趣,我每次返屋企打開門,佢就企正喺廳中間迎接,好似狗咁樣,我出門口佢又會企定定望住我『送客』。」
「有時我啲朋友嚟到,佢會埋身揩來揩去social(交際),完全唔驚陌生人,直情公關貓咁,似足我一樣。」看來Bonnie十分「老懷安慰」。
放大圖片 / 顯示原圖訂戶登入
下一篇: | SERA關愛約章六大原則 |
上一篇: | 喜歡繪畫 夢想開展覽 |