熱門:

2021年9月13日

周一人物

新媒體達人黃雅芬 當橋樑做伯樂
憑敏銳市場觸覺 助創作者展才藝

媒體行業着重與人溝通,數位媒體網路公司VS Media創辦人黃雅芬(Ivy)屬箇中高手,由早年為雅虎香港開荒,到先後出任電視廣播(00511)官方網站TVB.com營運總監、壹傳媒(00282)旗下壹傳動行政總裁,到參與創辦膾炙人口的MyTV,還有蘋果動新聞,以至近年進軍新媒體,靠的是敏銳市場觸覺,「可能自己鍾意同人溝通,容易睇到市場未來方向;針無兩頭利,有時行得太快,其他人未必明,所以條路係辛苦,但幾滿足。」

Ivy善於溝通的性格,可說從小煉成。她生於傳統重男輕女潮州家庭,是家中6姊弟的長女,「可能因為我係大女,自細爸爸媽媽當我男仔咁湊,性格比較男仔頭,爸爸成日話我應該係仔。」小時候Ivy常到父母在石硤尾的打冷食店幫手,客人三山五嶽,她很早學識「睇人眉頭眼額」,為日後從事媒體行業打下良好基礎,「好多江湖人物幫襯,跛豪(已故江湖猛人吳錫豪)成日嚟;與唔同人相處得多,溝通上係比同年紀叻啲。」

身處是非地,刀光劍影等大場面司空見慣,「成日有人打交,真係拎把刀出嚟互劈,啲人一反枱,媽咪就叫我哋收埋啲刀刀叉叉,細路吖嘛,移動得快啲,我哋好有默契。」如此「精采」成長經歷,Ivy童年志願也與眾不同,「細個想做『媽媽生』(夜總會舞女大班),作文『我的志願』都係咁寫,當然畀老師鬧,話無出息。反而爸爸媽媽無反對,覺得都係一個leader(領袖)。」

Ivy憶述:「嗰陣住石硤尾啲人好窮,打冷店嘅客多數唔係咩有錢人,好多時夜晚見啲男仔,帶啲好靚嘅姐姐嚟食飯,後尾先知佢哋係『馬伕』(色情中介)同小姐(性工作者)。」她笑說當時諗法是將來工作上不想受支配,要做負責帶隊的崗位。

雅虎在港第一員 曾晤馬雲

無論長大後做什麼,在「童年Ivy」腦中,覺得要努力讀書才有所成,結果會考成績優異,足以在本地升學;惟隨着見識增多,想法也有改變,渴望放眼世界,「我叫爸爸媽媽畀一張加拿大單程機票,同埋一年學費我去讀書,將來要出人頭地。」結果16歲便隻身遠赴北美,半工讀在多倫多大學完成商學士課程,1996年畢業後原本得到當地公司聘約,不過素有自己想法的她希望見證九七回歸,回流香港,翌年加入雅虎香港,成為集團在港首位員工。

那時雅虎連全球網站仍未開通,Ivy的職位是業務代表,負責游說客戶投放雅虎橫幅(banner)廣告,「嗰陣香港連用Yahoo email嘅人都唔多,莫講話網站落廣告,同埋廣告banner傳統係用間尺逐cm(厘米)度大細,網頁廣告唔得,電腦屏幕banner size唔同,淨係向客戶解釋個pixel(像素)都有排講。」

不說不知,Ivy首批顧客,包括今日國際科技巨擘阿里巴巴(09988),「我同馬雲(阿里創辦人)做過presentation,廿幾年前梗係唔會知佢咁勁。」當年Ivy主要客戶是希望做美國生意的中港中小企,需要在雅虎國際網站投放廣告,直到一年半後,雅虎香港網站才正式成立,她意識到要打造本地化訊息平台,於是與搜索引擎團隊合作,強化本地化搜索結果。

方逸華邀入TVB拓網上平台

經數載發展,雅虎香港由一人擴充至約180人團隊,Ivy升任高級總監,負責全球銷售,幫客戶借助數碼營銷開拓亞洲市場。人才當然多人爭,2007年她獲TVB前行政主席方逸華(已故)邀請,擔任TVB.com營運總監,翌年協助公司推出網路電視平台MyTV。「嗰陣算係全球好早嘅電視台提供OTT(Over-The-Top media services,網絡電視)服務,所以TVB曾經試過行得好前」,結果Ivy成功改組TVB.com,由2008年只有約100萬用戶的企業網站,變成2010年底擁720萬活躍用戶的娛樂門戶(portal)網站。2011年8月,她尋求新挑戰,9月轉職壹傳動行政總裁,負責移動業務開發。

Ivy任內傑作是令蘋果動新聞轉虧為盈,「我由Yahoo年代開始,一直負責銷售同做生意,去到壹傳媒都係做呢啲,(動新聞)唔可以一路燒錢,個business model(商業模式)應該從邊度monetize(變現)得到呢?」在她領導下,公司移動業務營業額連續兩年翻倍。幹出成績的Ivy選擇急流勇退,2013年告別打工生涯,創辦一站式時尚分享購物平台Viss,未幾即獲加拿大傳媒集團HMV收購。

創立VS Media 邀品牌合作

初試啼聲反應理想,Ivy乘勝追擊,回歸初心──最愛的媒體行業,創立VS Media,提供網路影音內容創作服務,冀成為創作者與品牌合作橋樑。何以對媒體行業情有獨鍾?「我鍾意同人溝通嘛,媒體就係同人溝通嘅理想橋樑,同埋我覺得媒體應該發放多啲正能量,唔係一味負面,我想藉住VS Media呢個平台,將創作人嘅『好嘢』(才藝)放大,帶畀更多人,呢條路好漫長,即管睇下行到幾遠啦!」俗語有話「識人好過識字」,其實不論任何行業,能建立良好人際關係,對發展都是百利而無一害。

採訪、撰文:許鎮邦

攝影:黃勁璋、受訪者提供

放大圖片 / 顯示原圖

放大圖片 / 顯示原圖

放大圖片 / 顯示原圖

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads