熱門:

2021年1月11日

周一人物

魔鬼投手李一強轉戰金融快狠準
由球場撞進投資市場靠爆炸力

不論中外,職業運動員退役後轉戰商界例子不勝枚舉,很多都做出成績,像新華滙富(00188)前董事總經理兼大中華區主管李一強(Adam),曾是本港第一代男子棒球隊隊長兼領隊,告別賽場後投身金融界由低做起,闖出另一片天,今年再轉跑道開設顧問公司,主攻策略性投資項目。由昔日棒球場投手,到如今做金融界投資,秘訣如一「爆炸力要好,準確度要高,頭腦要靈敏」。

李一強(Adam)出身基層家庭,小時候住荃灣福來邨,「屋邨仔無咩嘢玩,有時經過佐敦英皇佐治五世公園,見到好多唔同國籍小朋友着住制服打棒球,好似幾開心」,隔着圍欄看得多,場內人開始留意到他這位「觀眾」,終於有次負責教波的李錦泉(棒球總會前會長,被稱「香港棒球之父」)主動問:「小朋友係咪想玩?一齊玩啦!」Adam如今回想,覺得「某程度上係棒球選擇咗我」。

時為八十年代,棒球仍屬高消費運動,每人要有球棒、手套等,不像踢波一個足球十多人玩,基層兒童根本負擔不起,「無錢交會費,試過畀俗稱『Team媽』嘅球隊保姆追:『一強,你要交會費喇,唔係無波打』,小朋友唔識反駁,咪唔去囉!」兩星期後,恩師李錦泉致電勸他回歸,答應代交會費,「真係好感恩同感動,從此就係個《點五步》(港產片,講本地首支華人少棒成立)嘅故仔,『魔鬼投手』就係我。」

港棒前隊長退役做「影帝」

解決會費問題,還要應付隊內階級歧視,「(隊友)屋企人都做警司、生意人、高官,呢啲小朋友即俗稱『金叵羅』,我就窮家子,啲家長會叫仔女唔好同我行咁埋;我着『白飯魚』,佢哋着釘鞋,好大對比。」輸在起跑線,令Adam決心爭氣,「知道唔打好啲就無得玩」,憑藉天賦和努力,很快成為球隊靈魂。

「嗰陣目標好簡單,要贏沙田(區隊),因為當年(前特首)曾蔭權係沙田政務專員,批咗筆撥款成立沙田體育會棒球部,好成功,年年都贏少棒聯盟總冠軍,大家都視沙田隊係最強對手。」Adam憶述。

那年代香港只有少棒代表隊,成員滿16歲就要離開,直到1992年棒總才正式成立,翌年組織首支成人隊,時年18歲的Adam獲選隊長,「係第一代,摸住石頭過河,教練、行政人員、運動員、執波執垃圾都係我。」

此後他多次代表香港出戰亞洲區比賽,惟這運動在港只屬剛起步,與其他國家及地區的水平難免有距離,遇上印度、巴基斯坦等強隊,經常被大炒,「好渣!正正要爭氣,所以咁多年我哋一直好努力將港隊嘅國際成績,由『無得打』到爭取入亞洲盃,箇中辛酸只有我哋參與者先知。」

1995年港棒首次參與亞洲盃,一如所料成績一敗塗地,Adam不服輸,立志兩年後捲土重來,更不惜放棄會考,全力投入訓練。然而世事無完美,1997年再戰,依舊鎩羽而歸,Adam更因過度訓練致傷患纏身,只好黯然退役,轉任棒總行政工作,「係有種好痛苦嘅心結,所以而家更希望幫助下一代。」

那時棒總資源有限,薪金不足以維持生活,Adam決定轉行,卻礙於學歷,只能從事一些勞動性質工作。前路茫茫之際,他獲一位經營證券行的棒球學生家長引薦到其公司任職,由辦公室助理做起,「其實乜都唔識,後生仔好單純,你畀機會我咪試囉!初時只做『影帝』,日日影印。」

半工讀轉行 膺最佳銷售員

由球場上受人敬仰的教練和隊長,變成公司最初級員工,他不諱言要調整心態,「確有點不能接受,既然決定要做,就唔畀自己選擇。」在金融業發展,學歷是關鍵,早年會考失利的他有感「書到用時方恨少」,努力半工讀,考取證券銷售員資格,專向一些其他經紀不重視的小客戶埋手,逐漸做出成績。

1999年聯交所(現稱港交所,上市編號00388)推創業板上市制度,Adam把握機遇,多次成為最佳銷售員,賺到第一桶金的他,未被勝利沖昏頭腦,「搵到錢,不過始終自己唔係財經、商科底,人哋叫我『爛鬼經紀』,只係炒炒賣賣,無內涵值同分析能力,嗰陣畀個棒球界前輩一言驚醒,因為我第一個學位係康樂及體育管理,覺得係時候讀返個商科學位」,結果一如所願。

「有麝自然香」,2003年Adam被新華滙富挖角,「知道呢度想發展大中華區(業務),同我理念好夾,一拍即合。」加盟後他轉型專責協助企業客戶上市融資及配股集資等,「老闆對我好好,放手畀我做(大中華區),由零開始,等於送咗個market(市場)畀我,梗要畀心機。」

上月底離開新華滙富外闖

如是者一做17年,他笑言期間幾乎「年半升一次職,升到無得再升。」現年45歲,算踏入人生下半場,心態也有所改變,「做sell side(賣方)做咗廿幾年,開始有啲悶,希望轉buy side(買方)做多啲direct investment(直接投資);而家睇到大灣區發展,同埋好多天使投資者以及企業開始上,日後嘅企業(市場)發展一定年輕化同多元產業化,對私募基金投放係個好機遇。」

正是這份信念,令Adam上月底辭任新華滙富職務,開設顧問公司,專攻策略性投資項目。談到成功秘訣,他形容,從前打波的投手特質,有助於商場發展,「爆炸力要好、準確度要高、頭腦要靈敏;做投資,心理戰術同樣好緊要。」不論球場或商場,只要戰術運用得宜,投出好球或擊出漂亮「全壘打」,成功自然無難度。

採訪、撰文:許鎮邦

攝影:黃俊耀、黃潤根、部分圖片由受訪者提供

 

放大圖片 / 顯示原圖

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads