熱門:

2020年12月21日

周一人物

斯程彭一心 一帶一路闢教育藍海
建築商俊和第二代 為家族拓新業務

中國主導的「一帶一路」倡議,為不同行業締造商機,教育是其一;本地老牌建築商俊和發展(現稱亞洲聯合基建,00711),今年成立姊妹公司斯程教育,積極審視這行業機遇,由俊和創辦人彭錦俊二女、斯程教育董事彭一心(Rita)領軍。Rita曾於美國及香港任職律師多年,其後與丈夫李根興(Edwin)創立盛滙商舖基金,主攻商舖投資,去年初回巢家族業務,專責打理教育範疇;跑道雖不同,信心依然十足,「『藍海策略』係我哋喺企業路上必須要行嘅方向」。

相比經常在電視節目及網上平台教人投資商舖的丈夫李根興,外界或對Rita認識不多,原來她是美國哈佛大學經濟學士、杜克大學(Duke University)法學博士,履歷相當亮麗;畢業後投身美國紐約司法界,在聯邦法院實習一年,參與刑事檢控及辯護工作,「專係審犯,啲人帶住幾百萬現金(走私)、販毒,做得最多係殺人犯。」

律師專長助夫創立投資基金

完成實習期後,Rita轉攻民事,先後於兩間美國律師行處理上市法律事宜、資本市場交易、破產、基金成立及其他企業事務;2004年已回流香港的她加盟花旗集團任法律顧問,一做10載,直到2013年其丈夫創立投資基金,這位廿四孝老婆放棄高薪厚職,夫妻檔「拍住上」。

多年之後,她講出當時感受:「其實(花旗)好想做落去,last day我全日喊,要落街避開同事,但嗰陣盛滙初成立,要處理證監牌照同好多法律、基金、產品文件,全部係我專長,所以不得不辭工,始終係自己先生。」

這個「閃着淚光的決定」結果證明正確,Rita為盛滙取得所需牌照,公司業務發展迅速,去年初她「功成身退」,依然選擇與家人工作,不過今次是兄弟姊妹,「完全係偶然,我哋4個從無計劃一齊做嘢,當時盛滙業務上晒軌道,自己又對教育方面有興趣,去咗小學同幼稚園試做助教。」

四兄弟姊妹各司其職好合拍

適逢兄長彭一庭及弟弟彭一邦分任主席與行政總裁的亞洲聯合基建因應「一帶一路」倡議,重點研究發展教育及醫療新業務,「兩件事咁啱同時發生,就返咗嚟公司。」何不重投依依不捨的法律老本行?「始終離開咗6年,同埋人到40歲會諗,自己學咗咁多嘢,點樣貢獻番個社會,我係鍾意去令別人去明白一樣嘢。」

俗語有謂「相見好、同住難」,何況一起工作,家人共事搞不好會傷感情,慣與丈夫拍檔的Rita顯然冇有怕,「我哋幾個專長好唔一樣,性格亦唔同,我覺得社會要做成一件事,正正需要唔同技能、性格去混合,我哋4個直情係dream team(笑),大哥諗大方向同策略視野,細佬工程師專業出身,執行同營運能力強,好懂得啟發新一代年輕人;妹妹(彭一欣)係藝術家,畫則嘅,完美主義者,佢追求嘅嘢係無形,我唔明;我來自法律界,數據分析型,講邏輯,加埋正好互補不足。」但意見不合總會有吧?「我哋係潮州人,中國人傳統階級觀念要尊重大哥,咁我都係二家姐;當個體制有清晰嘅框架,已省去好多不必要拗撬。」

環球教室連繫世界各地學童

「現今好多後生仔女成日同屋企人談判,其實只要價值觀同制度明確,唔需要太多無謂談判,談判咁緊要嘅事唔好去咗日常生活細節度。」有別於傳統教育機構,斯程教育專門開設網上課程,主要教授英語演說和辯論,冀加強學童判斷力及創意思維,並以Global classroom(環球課室)為主題,連接大灣區、「一帶一路」與全球學童。

斯程的學生來自6個地方,香港佔約80%,其餘是內地、新加坡、馬來西亞、菲律賓及美國,未來希望再趨多元化;Rita形容教育行業永不止息,要與時並進,「每位小朋友都係新嘅考驗,點解我哋專做6至12歲(學生)?就係當我回望人生,最開心時刻係充滿渴求、熱愛學習嗰個年代,我好想將呢種開心學習感覺傳承落去。」

然而教育從不是熱門賺錢生意,Rita不諱言如非公司本身有意開辦,她自立門戶或許更有彈性,「呢個係公司方向,因為『一帶一路』下,未來二、三十年都會有新嘅中產消費群,中國人社會必然首先消費喺教育同醫療。」

「實情公司之前喺教育,已經涉及好多唔同方面服務,以核心業務(建築工程及管理)為例,做緊百幾間學校嘅設施管理,俊和巴士亦服務緊多個辦學團體,校園建築更係我哋主業之一,幫過好多著名學校起好多大樓,我哋一直牽涉學校嘅硬件建設,依家只係開拓埋軟件方面。」Rita娓娓道來。

掌握英語演辯提升獨立思考

市場充滿機遇,可是教育行業競爭激烈,要突圍而出,她認為要靠「藍海策略」,即創造無人與其競爭的市場空間,「紅海策略係face your competition head on(正面比賽),但我唔會做補習社,非我專長;我哋目標係教唔鍾意英文嘅小朋友學好英文,愛辯論、愛思考、愛表達;好多家長話佢哋嘅小朋友好怕醜,雖然好多嘢諗、好聰明,但唔肯分享,或者唔善於表達。」

Rita強調,這些都是斯程最希望幫助的學生,「你要先學識咗(演講或辯論),先可以獨立思考判斷,究竟鍾意定唔鍾意,當你能夠用自己思考去撇除呢啲偏見,你嘅perimeter of knowledge(知識範圍)同perimeter of capability(能力範圍)會不停擴大,我哋希望畀到呢份『禮物』小朋友,咁樣佢哋會終身追求學習,呢個就係我哋嘅藍海策略。」

已故中國近代教育家于光遠生前講過:「一個人的知識如果只限於學校學習到的那一些,這個人的知識必然是十分貧乏的。」求學不只求分數,主流以外的「補充劑」,可一生受用。

採訪、撰文:許鎮邦 

攝影:黃俊耀、被訪者提供

 

放大圖片 / 顯示原圖

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads