熱門:

2020年11月2日

周一人物

遠中黃今證棄劇從商 重實踐意念
由演藝轉戰地產 坦言曾「交學費」

新冠肺炎疫情未止,商業世界各板塊都在檢視進退部署,有外地發展商選擇在港擴張步伐。來自新加坡的遠中集團,今年初以12.12億元向新世界發展(00017)購入跑馬地項目EIGHT KWAI FONG HAPPY VALLEY的139伙權益,屬該集團首個香港項目,翻新後剛推出市場,收租放售各佔約一半。此收購項目領軍人物是九十後的集團香港區資產管理部總經理黃今證(Dora);早年曾任舞台劇演員的她,6年前「棄劇從商」轉戰地產界,半途出家依然有板有眼,「兩樣嘢(藝術跟建築)其實都係講建構,將一個意念變成一個製作。」

不少發展商高層具備財經或商界背景, Dora算是異數,她在香港演藝學院畢業,主攻音樂和舞台劇。問到是否從小就有表演慾?她笑言「可以咁講」。那為何對舞台劇情有獨鍾?「同觀眾互動性比較高,睇到大家即時反應,挑戰性同滿足感都大啲。」然而,在港長大的她,心知興趣不能當飯食,當年選科純粹出於任性,從無想過以演藝作終身事業。

活用執生技巧推新盤

做了幾年幕前,過戲癮圓夢後,2014年Dora經親戚介紹加盟來自新加坡的遠中集團,初時負責澳洲項目,一切由零開始,「之前連集團個名都未聽過,(自己)真係一張白紙,又無得好似返學咁有得讀,所以落手落腳去做,邊做邊學,好多唔識就要問,都好多謝前輩肯教。」

讀非所用,加上職場跑道急轉彎,過程中可會難適應?「又唔係好難,好多我喺藝術領域學到嘅,嚟到呢邊(商界)都用得番。」她解釋,兩者同屬建構出來事物,把意念變成製作,「同樣係適應能力要好好,識得做調整,同埋時間上嘅管理、multi-task(多重任務)唔同嘅嘢。」

有謂「台上一分鐘,台下十年功」,Dora坦言,舞台劇演出前要做好預備工夫,譬如研究角色性格、演繹手法、語調運用等,才能將角色完美呈現;推新樓盤也一樣,事前要做足功課,包括研究投資潛力、位置優越、買賣回報等。

以拍電視劇或電影為例,錯了可以NG再來,舞台劇無take two,因而培養出臨場應變能力,「喺好多突發情況,例如出場時唔記得拎道具,就直接走咗出去(舞台),但The show must go on。(那觀眾會否識穿?)睇你點執生啦,呢啲(蝦碌場面)係一定會發生,無得避免。」

舞台上撞板,頂多被觀眾柴台,發展商一旦做錯決策,代價可大得多。Dora不諱言「交過學費」;她憶述早年集團曾收購港島西半山一個舊式建築項目地下和一樓,「之前已預計,歷史耐,結構可能會有少少漏水,點知成交後不足一個月,成個木製假天花冧咗落嚟,超級大鑊!」

早年收購撞板速脫手

不幸中之大幸是發生意外一刻現場沒有人,故未有造成傷亡,「第二日去睇,咦,做乜冧晒?原來漏水程度唔係之前睇咁簡單,已經去到極度嚴重,之後搵過好多律師、則師、公證行,大家都話好難補救,因為樓上單位由其他業主持有;最後董事會話單嘢咁煩,賣鬼咗佢啦。」

失敗並不可怕,最重要是懂得從錯誤中學習及成長,Dora直言:「學到一樣嘢,就係投資物業買賣唔可以投放太多個人感情,當年對嗰幢建築一見鍾情,覺得靚,無細心留意到結構問題。」

經一事,長一智,Dora不諱言自此對舊建築起了戒心,隨即來個「植入式廣告」,強調集團今次的跑馬地項目本身只約4年樓齡,「安心好多」。

為買家建造宜居空間

成功轉型的Dora,形容看似風馬牛不相及的藝術界與地產業皆為別人帶來歡樂的「表演舞台」,「呢個行業(發展商)同表演藝術好似,比如演出時,喺劇院入面對住觀眾,雖然大家睇緊同一套戲,當結合咗自己睇法就會有唔同感受……正如你企喺一幢樓對面,望住入面單位,佢哋即使都有類似圖則同風格,但每個家庭對同一個屋苑、同一樣圖則,會有唔同睇法,所以無論表演藝術工作者或發展商,都要畀到觀眾同顧客最好嘅體驗。」Dora如是說。

發展商創造起居空間,藝術家能豐富人們心靈,兩者所提供的元素,在生活上其實相輔相成,橫跨這兩個界別的Dora,自然能夠揮灑自如。

採訪、撰文:許鎮邦 

攝影:黃勁璋、受訪者提供

 

放大圖片 / 顯示原圖

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads