熱門:

2016年9月5日

周一人物

努力讀書脫草根 美劇喚起從醫心

醫者父母心,陳家亮行醫多年,治好病人多不勝數,問他是否自小立志做醫生,沒想到院長坦白得可愛,直言讀醫是為了脫貧,「我出身草根家庭,細個住牛頭角下邨廉租屋,自幼屋企薰陶,就係將來唔想過呢啲日子,一定要努力讀書,工程師、律師、醫生都好,總之考個專業資格,我當年亦的確係抱住呢個心態。」

童年輪街症 排隊6個鐘

「細個屋企附近有個私家醫生,門口寫住『內外全科雙學士』嗰啲,成日見佢揸Benz返工,嘩原來做醫生搵咁多錢。」至於對方醫術如何,陳家亮笑言不清楚,「邊有咁富貴睇私家醫生,平時自己係去油麻地、觀塘啲健康院輪街症,晨早5點鐘要到,排5、6個鐘隊,好凍、好攰,印象中啲醫生都唔會點睬人,一兩分鐘就叫你走。」

陳家亮承認,童年對醫生的印象帶點抗拒,直到後來看到美國電視連續劇《杏林雙傑》(Medical Center)才改變觀念,「主角加能醫生(Dr. Gannon)好叻,細心照顧病人,好有親切感,同我現實中見到嘅醫生好唔同,我當時心諗,如果自己將來做到佢咁樣嘅醫生就好,所以立定決心去讀醫。」公仔箱人物性格真假難分,但亦全靠這套電視劇,否則香港今日可能就少了一位仁醫。

力排眾議入中大求發揮

念預科時,陳家亮成績已是全級數一數二,按照其「脫貧論」,入讀港大醫學院似乎理所當然,可是他偏偏出人意表,選讀當時才第二屆招生的中大醫科, 「選科前有次去中大開放日,遇到個英國醫科教授,好奇問佢點解肯嚟開荒,佢話佢嘅理想係要喺亞洲建立一間專業學府,我自己都係有冒險精神嘅人,心諗港大呢啲百年老店,創新空間有限,反而中大啱啱起步,更有機會畀我發揮創意。」

結果陳家亮放棄了港大學位,當時自然被中學副校長及主任鬧到狗血淋頭,但他堅持己見,入讀中大後卻發現要面對另一難題,「嗰陣仲未有威爾斯親王醫院,全香港得聯合醫院肯畀我哋做實習,聯合其實好細,我哋惟有喺醫院出面個草地擺幾個大貨櫃,喺裏面上堂同埋on call。」或許由於曾經身處缺乏資源的環境,令他磨練出堅強及永不放棄的鬥志,可說另類收穫。

陳家亮這種「包拗頸」的反叛性格,似乎是與生俱來,「細個讀書已經坐唔定,又多嘢問,成日問點解,老師都唔太鍾意我,如果當時醫學有而家咁先進,可能已經歸納我做過度活躍症」;即使後來醫科畢業選專科,他亦繼續任性,不選心臟科與內分泌科等熱門,反而揀當時人手嚴重短缺的腸胃科。但沒有昨日的因,不會有今日的果,如今貴為院長,或足以證明他當日的決定正確。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads