2021年7月1日
歐國盃十六強認真緊湊,8場波有4場打加時,瑞士對法國更加要互射十二碼添!禮拜三烏克蘭2比1贏瑞典嗰場,何止打甩髀?直頭係踢彎脛骨,搞到夜媽媽睇波,好似睇緊恐怖片咁!茅柴者係瑞典中堅丹尼臣,受害人就係烏克蘭嘅比斯耶甸。
呢場波瑞典其實值得晉級,曾經中楣又中柱,好運少少90分鐘搞掂對手,可惜加時戰輸1比2。丹尼臣發癲發生喺98分鐘,佢禁區前同比斯耶甸搶五五波,快一步解圍再趁勢踩上膝頭,於是出現對方左膝以下極度彎曲嘅恐怖場面。
意大利球證奧沙圖原本出示黃牌,經VAR球證提醒先重判紅牌,結果,烏克蘭喺瑞典少打一人下,施真高左路傳入中路,由多夫碧門前頂入晉級八強。如果高大嘅丹尼臣在陣,話唔定可以阻止呢個失波呢?真係惡有惡報啦!
抽水抽着污水
內地傳媒向來鍾意抽水博點擊,借啲易就提下中國足球,呢次就大字標題寫:「大連人外援廢人式飛鏟……」真係唔講唔知丹尼臣原來喺中超効力。不過,射入世界波就話與有榮焉啫,打茅波有咩好認親認戚啊,你估中國足球形象好好咩?
所以,呢個世界都係蠢人多啲!遇上蠢人只好怨遇人不淑,好似記者賽後問瑞典教練安達臣,有咩同丹尼臣講嗰陣,佢就強忍淚水話:「我只係擁抱下佢啫!」心嗰句係咪:「我直頭想練死佢啊!」講笑啫,安達臣好有紳士風度嘅!
「呢場係職業生涯最悲慘一役,我哋佔盡優勢只差入波!丹尼臣個動作,我當時覺得罰球都唔應該有,何況係紅牌?不過,看台同事睇得清楚啲,佢話我知張紅牌好合理!」安達臣透露道。唔輸都輸咗,下次唔好輸得咁蠢啦!
執返身彩嘅烏克蘭就首度殺入歐國盃八強,教練舒夫真高自信爆燈,連下輪對手英格蘭都唔多放眼內:「英格蘭係好勁,板凳深度又夠,仲有個優秀教練團隊,但咁樣係唔會嚇怕我哋,相反仲會刺激起球員鬥心。足球同人生一樣,凡事都有可能!」
嘩,「軍刀」先生果然老江湖,面對傳媒好似賣緊廣告咁,之前得罪歐國盃贊助商嘅C朗,真係要同前輩學先奸啲啦!
放大圖片 / 顯示原圖
訂戶登入