熱門:

2021年6月9日

達聞西 競技研究院

亂籠美洲盃

好消息!各位南美足球fans們,今個夏天有美洲盃睇啦!臨急接火棒嘅接辦國球隊巴西,周一宣布以世盃外嘅強陣參賽,烏拉圭、智利等國家隊亦都決定唔再杯葛!咁就一天都光晒啦!須知道美洲波喺香港時間朝早開波,好難得㗎嘛!

呢屆疫下美洲盃可以講亂到七彩!唔講更換主辦國同巴西國內反對聲音,巴西足總呢幾日都夠晒立立亂,主席卡波高周日暫停職務,由臨時主席紐尼斯接手;國家隊教練泰迪就逃過炒魷命運,唔需要向名宿連拿度交出帥印。

呢單高層變動好複雜,卡波高有兩大「死因」,首先係鹹濕自己個女秘書,私下提出1200萬雷亞爾和解遭拒,於是被足總道德委員會勒令停職;第二個原因係衰自把自為,未得球員同意就舉腳贊成接辦美洲盃,導致球員群起杯葛。

球員見高層大變動條氣都順返啲,加上眼見求盃心切嘅宿敵阿根廷話繼續參賽,咁當然要落場摧毀對方嘅冠軍夢啦!不過,隊長卡斯米路稍後會發表聲明,講明球員反對賽事嘅立場,只不過係盡球員參賽嘅責任啫!

閉門作賽

由於巴西臨時答應舉辦,防疫措施、疫苗注射等都係「彈性處理」,10隊波、28場波、650名人士參與,冇種過疫苗嘅人呢個禮拜可以打第一劑,不過唔係硬性規定一定打!主辦城市分別係里約熱内盧、戈亞尼亞、庫亞巴、巴西利亞。

參賽球隊可以選擇唔常駐巴西,好似阿根廷就會駐紮喺布宜諾斯艾利斯,有波打先提前一日飛過去,場波一完又飛返去,好似打客場比賽咁。聽講好多隊都傾向呢個做法,不過烏拉圭就唔打算飛嚟飛去,會喺北部搵個城市做基地。

巴西國內疫情仲未平定,呢屆賽事就會閉門作賽,換言之巴西呢次一定蝕得好甘,森巴球迷又冇得入場睇波,冇錢搵仲冇得與民同樂,一旦期間出現大量球員確診,抗疫不力嘅巴西總統博爾索納羅出年想連任都幾難!

對於香港球迷嚟講呢個夏天就精采啦!6月就日頭睇美洲盃、夜晚睇歐國盃;之後7月底嘅東京奧運個時間仲正,可以全日睇足咁多個項目,炎炎夏日居家睇運動比賽,都不失為抗疫嘅良方啊!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads