熱門:

2021年5月29日

達聞西 競技研究院

係你嘅就係你嘅

乜鬼嘢「躺平族」啫?咪即係日本人講嘅佛系,或者香港人講咗幾十年嘅:「係你嘅就係你嘅,唔係你嘅就唔係你嘅」?從呢類社會現象,就知邊個社會發展得快,邊個發展得慢啦!香港人乜都睇化晒,咪大家鬥命長囉!

巴塞隆拿教練朗奴高文都唔好咁執着啦!西班牙《FOX體育》記者基朗尼斯喺Twitter爆料,話呢位教練因壓力太大要送院,不過冇大礙已經出院。咁又係啊!佢呢兩日同會長拉樸達傾咗好多次,到底應該留低定離職,壓力點會唔大啊?

其實點解唔睇開啲呢?望下歐洲豪門嘅情況就知,冇貨交嘅皇馬教練施丹離職,贏到意甲嘅干地離開國際米蘭,祖雲達斯教練派路都危危乎,巴黎聖日耳門嘅普捷天奴凳都未坐暖就可能去西甲或英超……足球世界就係咁㗎啦!

朗奴高文夠根正苗紅,衰就衰在係前會長巴杜美嘅馬仔。入錯馬房慘過入屠房,加上之前同巴杜美趕絕蘇亞雷斯,搞到美斯等球星好不滿,其實佢應該早走早着,唔好再奢望有咩奇蹟出現,正所謂長痛不如短痛吖嘛。

據巴塞隆拿傳媒《每日體育報》報道,巴塞如果提前炒朗奴高文要賠成1300萬歐羅,拉樸達當然希望佢收順啲,預計呢兩個禮拜就有結果。呢位教頭有咗呢筆錢,啪埋兩針復必泰就可以暢遊歐美,減完壓再計劃將來都未遲。

兩星期定去留

呢位名宿球員時代已經火爆,塊面紅到好似關公咁,果然心臟唔係幾好,舊年5月喺老家阿姆斯特丹出過事,因輕微心臟病發入院搶救,好彩嗰次都大步檻過。既然有呢類發病史,朗奴高文更加要識得放開懷抱,該放手就放手。

巴塞呢個夏天將重建,球王美斯預料將續約兩年,至於新教練人選就未定,到底係咪名宿沙維回巢執教呢?不過,更重要係個癡肥陣容點瘦身,有冇球隊肯出高價買走古天奴、基沙文、奧士文尼迪比利呢?

講開又講啊!巴塞上述問題都係小問題,有錢就可以解決。如果成個社會充斥住「躺平族」,就認真大件事!始終未來係屬於年輕人嘅,佢哋都唔肯努力,社會又點進步呢?所以,放棄乜都得係唔可以放棄年輕人。

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads