熱門:

2021年2月20日

達聞西 競技研究院

有錢仔搞波

上一代香港有錢佬好鍾意踢波,好多仲泵水搞足球隊,搞到本地球市幾熱鬧啊!可惜,一切都係the good old days啦!反而,內地富二代張康陽搞緊國際米蘭,雖然唔知仲玩得幾耐,但係起碼都叫做為足球出一分錢啊!

英甲球隊新特蘭日前有新班主上台,佢就係法國23歲有錢仔基爾(Kyril)啦!個名就普通啲,不過「路易達孚」個姓就唔嘢少啦——就係荷蘭農業、食物加工、運輸等行業嘅大企業路易達孚嘅家族成員啦!

呢位小班主身家20億歐羅左右,但家族企業一年收益就幾百億,阿媽馬嘉麗達仲係全世界最有錢嘅俄羅斯女士。爸爸羅拔喺商界同足球界響當當,1996年從法國富豪泰比手中拯救馬賽,同巴黎聖日耳門平起平坐。

有乃父之風

基爾當年同孖生阿哥莫利斯,一齊見證爸爸點樣救馬賽,同白蘭斯、迪甘斯、杜奧巴等名宿拍晒膊頭。可惜爸爸2009年因白血病去世,家族生意由媽咪接手,2017年索性將馬賽放盤,不過足球夢已經埋喺基爾心中。

兩兄弟各持有20幾億信託基金,不過,爸爸生前要求佢哋環遊世界,諗清諗楚有咩志向,先至可以運用呢筆錢,於是莫利斯喺瑞士做DJ,基爾就一腳踩落新特蘭呢支球隊,羅拔在天之靈都應該好安慰啦!

新特蘭係超級潛力股,排緊英甲第七位,來季大有機會升上英冠,順風順水的話,2022/23球季可以升上英超。新特蘭欠債高達2億英鎊,相信基爾可以「疫情價」入主,就算每年赤字3500萬鎊,對佢嚟講係小問題。

基爾唔係得個有心,廣識體育界、經紀界名人之餘,仲進修體育管理學等科目,屬於行走江湖又得、走入廟堂又得嘅後起之秀。佢唔使篤計數機都知,只要升上英冠赤字即刻清零,上到英超嘞喎,更加係豬籠入水啦!

唔好意思,𦧲口水講過!基爾搞波點會為咗錢呢?佢梗係想帶領新特蘭重新崛起,好似爸爸當年帶領adidas同馬賽復興,人生有一定財富,就唔係諗住錢㗎啦!邊似得fb個教主,share新聞唔肯畀錢,仲block咗澳洲fb嘅新聞鏈接!不管有錢定冇錢,做人都唔好咁朱克伯格啦!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads