熱門:

2021年2月4日

達聞西 競技研究院

火星撞地球

法國巴黎、馬賽向來係藝術之都,不過自從湧入大量移民之後,種族、失業等社會矛盾日益惡化,1995年電影《怒火青春(La Haine)》已經講出社會危機,可惜到今時今日都毫無改變,甚至火頭愈演愈烈。所謂和諧社會,真係遙不可及。

馬賽上周末又發生小騷亂,不過呢次同失業無關,而係關大名鼎鼎嘅馬賽足球隊事。嘩!足球係開心嘢都搞到立立亂?咪就係因為球迷不滿美國班主艾路達囉!加上今季戰績下滑,由上季亞軍跌到目前第九位,於是怒火大爆發。

場外掟石頭,估唔到內部都大內訌,葡萄牙教練保亞斯周二記者會,炮轟會方未得佢同意從些路迪借來尼查姆,「我都係上官網先知有人加盟,我同球隊講過唔要尼查姆,咁嘅轉會方式唔係我風格,違反我職業操守!」保亞斯講。

盼赴日本教波

呢位摩連奴首席大弟子,當然唔會為兩斗米折腰啦!佢話:「我已經向會方呈辭,我唔要錢,我要即刻走!」支持者當然拍爛手掌啦!不過,艾路達都唔係人咁品,周三下令球會出聲明炒保亞斯,擺明話:而家唔係你辭職,係我炒你啊!

正所謂「登說登有理,侵說侵有理」,特朗普同拜登都各有支持者,馬賽方面都講到理直氣壯㗎:「保亞斯喺記者會上嘅言論,極唔尊重球會,尤其係攻擊球會高層,係絕對唔可以接受,所以我哋宣布解除佢教練職務。」

一個硬幣有兩面,馬賽背住保亞斯買人,仲要雙方講過要有商有量,到頭嚟竟然自把自為買人,究竟以後係咪艾路達親自督師啊?真係一啲都唔尊重保亞斯!不過,呢位葡萄牙教練對住記者提出辭職,仲講到希望去日本教波,又係幾落馬賽面嘅。

球迷一點就着,教練同班主又口沒遮攔,馬賽隊又點會唔「六國大封相」啊!艾路達真係成個特朗普咁,日前居然將衝入訓練場嘅球迷,比喻為衝入美國國會嘅美國示威者,佢唔係唔知馬賽BLM運動幾激啊?

睇得社會矛盾多,就知呢個世界係冇無辜,緊係有嘢唔啱先乞人憎;左膠有左膠嘅可恨,右膠有右膠嘅可惡,點解唔撈勻啲呢?哎,你估《食神》整瀨尿牛丸咩?戲嚟喳!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads