熱門:

2021年1月25日

達聞西 競技研究院

肥賓借疫遁

新冠疫情真係萬能key,咩都可以用疫情做理由。NBA波神米高佐敦無人能封、無人能阻,又點啫,咪又變咗「咪Go佐敦」?擺低幾個生果、幾罐午餐肉,就全部同我留喺屋企。真係天才,呢班官真係叻過卡爾馬龍、艾榮、奧拉祖雲多多聲。

呢個世界好多叻人,好似西班牙領隊「肥賓」賓尼迪斯,周六突然宣布同中超嘅大連人分手,提前解約留喺英國陪家人抗疫,呢啲理由,幾無情嘅老細都唔會say no啦!佢同成個教練團隊都唔會返中國,3月就開季竟然放球隊飛機。

開季放飛機

據英國傳媒披露,肥賓睇見中國北方疫情惡化,而且防疫措施非常嚴厲,好似所有外國人返去要隔離28日,期間唔可以離開屋企半步。佐敦、油麻地不過係周末封區,都搞到街坊拖箱孭狗大逃難,何況困28日?肥賓咪肥到成隻加菲貓咁?

肥賓合約仲有一年,每年年薪高達10000萬歐羅,呢個價喺歐洲絕對搵唔到。不過,大連人嘅實力唔得,上季更加要打護級組,加上今季中超限制薪酬同班費,佢教落去都唔會有咩前途,考慮埋疫情嘅緣故,於是把心一橫當係破財擋災啦。

肥賓呢次離開中超,意味中超星級外教時代畫上句號,上季史杜高域、鄧納東尼、史泰力克先後離隊,就剩低北京國安嘅比歷有番啲地位,上季冠軍江蘇蘇寧教練奧拉羅尤,如果肯接受減薪都會留低,否則呢隊冠軍球隊就要另覓人選啦!

至於廣州恒大(下季改叫廣州隊)近日就宣布鄭智唔再擔任總經理,今季繼續以球員身份落場,會方話係尊重其個人意願。鄭總上位48日就落台,係咪意味住意大利教練簡拿華路繼續教呢?相信要佢喺上海隔離完到廣州先慢慢傾啦!

肥賓同大簡唔同,佢喺歐洲球壇執教履歷豐富,呢頭話唔教大連人,嗰頭就有好多球隊爭住要,好似蘇超勁旅些路迪就係其中之一,如果成事嘅話就精采啦!到時格拉斯哥流浪教練謝拉特,將會迎戰呢位利物浦嘅前領隊。

不過,相信肥賓唔使去蘇格蘭搵食嘅,淨係英超都大把機會,好似教過嘅車路士、紐卡素都盛傳換領隊,肥賓絕對係最合適嘅人選。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads