熱門:

2021年1月22日

達聞西 競技研究院

救救林伯!

「林伯」林柏特帥位告急啦!達聞西上次睇車仔0比2不敵李斯特城,成隊波落晒型十足洩氣嘅氣球,場上球員攤手、搖頭、念念有詞,場邊嘅林伯耷晒頭,上述身體語言充滿負能量,大家都感覺到時日冇多啦!

果不其然,英國傳媒報道車仔班主阿巴莫域治,打算搵個曉德語嘅教練救亡,唔知係直接取代林伯,定係以顧問形式傍住佢,總之執教架構會有微調。換言之,呢兩年意氣風發嘅少帥,已經變咗老氣橫秋嘅阿伯啦。

據講,高層覺得林伯唔曉德國波嘅特點,導致重金加盟嘅德國球星迪姆華拿同夏維斯冇用武之地,加上成隊波有5個主力來自德甲,所以想搵德國教練發揮潛力。咁利物浦領隊高普大部分手下都唔係德語幫,咪一樣打出多蒙特嘅味道?關語言咩事呢?

不過,呢件事唔可以怪林伯,要怪就怪阿巴莫域治。林伯上季調教出一套強陣同戰術,唔知老細有錢冇碇使,定好心做壞事啦!竟然夾硬安插幾件外援落嚟,林伯本身就係「新牌仔」一名,搞到表現同成績反而差咗,呢隻鑊就梗係由佢孭啦。

睇番車仔近8場聯賽嘅表現,可以用節節敗退嚟形容,你話輸一兩場就話啫,接二連三輸畀同級球隊,正好證明球隊信心大崩潰,只能夠透過換領隊嚟力挽狂瀾,而且愈快愈好啊!

車仔唔經唔覺已經跌至第八位,19場聯賽得29分,以兩分領先第十位嘅阿仙奴,邊個估得到今日嘅車路士會變成昨日嘅阿仙奴呢?對方領隊阿迪達帥位由搖搖欲墜變得穩固,反而林伯就聞到魷魚香,下幾輪對狼隊、般尼同熱刺,有咩差池就係咁先啦!

施丹危危乎

呢邊廂林伯告急,另一邊廂皇馬嘅施丹都危危乎,繼上周西超不敵畢爾包後,周三西班牙盃更加以1比2被丙組球隊艾高恩奴淘汰。施丹都知呢場波唔輸得,賽後話:「我個帥位?睇下呢幾日有咩事發生啦!」究竟會有咩事發生呢?大家真係要拭目以待啦!足球場係英雄地,同時亦都係英雄塚。有表現你就係英雄,冇貨交你就係dead body。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads