熱門:

2021年1月21日

達聞西 競技研究院

球王之選

香港波地仲封緊場,職業球員波都冇得練,話係配合全城抗疫,之但係年宵花市就照辦可也,到底咩活動人群密集、病毒傳播高危啲?高官同普通人嘅邏輯相差好遠。日本高中足球聯賽早日前收鑼,冠軍山梨學院嘅岩岡遼太就成為球壇熱話。

本來日本高中波冇咩人留意,不過岩岡遼太受過C朗祝福,於是就變咗大新聞。話說呢位球王2014年訪問日本,年僅12歲嘅岩岡遼太被選中用葡文提問,點知自我介紹都聽到C朗皺眉頭,旁邊啲記者笑到飛起,你估呢位球王點反應?C朗當堂黑晒面,不過唔係對住岩岡遼太。

C朗斜視記者、當住個小朋友,對住鏡頭講:「點解佢哋會笑?佢葡萄牙語講得非常好啊!佢咁努力去講,記者們應該高興先啱。信念,努力,唔好放過一個機會。」C朗最後一句最重要,岩岡遼太當日袋咗落袋,仲扣實個鈕,一路袋到今日。

原來,岩岡遼太6年幾來屢受挫折, 幾次被高校足球隊拒之門外,直至山梨學院願意收留,呢位中場球員努力不懈,終於喺高三帶領球隊稱霸全國。呢位當年嘅光頭仔講:「我一路謹記C朗嘅忠告,過去幾年屢次受傷,今年特別傷得重,多謝全國各地朋友嘅支持!」

謹記C朗忠告

岩岡遼太呢個冠軍得來不易,之前亦都承受過好多痛楚,不過同時亦都係幸運兒。佢Twitter個頭像就係同C朗嘅合照,有3000多個followers咁多,呢個數字對於高中生嚟講已經係天文數字。所以,冇當年向C朗提問嘅故仔,佢只會係普通嘅高中足球員。

中港成日講起足球發展,好自然會同日本比較,其實咪盞得個恨字?人哋高中足球賽都有電視台直播,睇得出全民幾重視校園足球。如果扯到政府支持嘅層面,就更加唔講猶自可,一講就把幾火啦!班高官連防疫都做啲唔做啲,足球發展真係識條鐵咩。

岩岡遼太毋忘教誨,對足球團火好旺盛,當然係抵錫啦!但係C朗當年為對方解圍,不忘灌輸正確嘅足球態度,更加係抵讚啦!踢波係冇得計嘅,投入幾多自然輸出幾多,計完就只有除低對波鞋,攞起本書刨㗎啦!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads