熱門:

2020年10月15日

達聞西 競技研究院

美帝亡人之心

達聞西以前聽到「美帝亡我之心不死」呢句話就想笑,不過家下呢真係笑唔出,甚至日日都要碌大對眼望實,唔好畀「山姆大叔」可乘之機。咩事咁嚴重?咪英超「大」茶飯計劃(Project Big Picture)囉!你哋唔係以為我講邊個啊?

呢個計劃關美帝事㗎!提出計劃嘅紅軍班主亨利,同埋曼聯嘅格拉沙家族通通都係「山姆大叔」,好彩阿仙奴嘅高安基未舉手表態,唔係分分鐘搞到場大革命。到目前為止,得英格蘭足球聯會嘅低組別球隊支持,仲未形成大氣候!

達聞西一向討厭貪婪嘅格拉沙家族,之前對紅軍班主亨利都幾有好感,但從呢個計劃內容可見,呢位生意佬幾陰濕同蠱惑,符合晒美帝嘅特點——霸道。喂,大叔!英超係英國人㗎,你哋係外來投資者啊!學人更改遊戲規則,識唔識分莊閒㗎?

首相約翰遜反對

呢個「大茶飯」推出時間亦夠毒辣!唔遲唔早揀正新冠疫情底下,低組別聯賽窮到冇米落鑊之際,提出6間大會提供2.5億救濟資金,兼投資地區足球。咁細球會仲唔爭住伸手?你話亨利幾咁卑鄙啊!呢啲叫做乘人之危,唔係君子所為嚟!

如果呢個計劃通過咗,大球會第日可以分到更多電視轉播費,變相導致貧富差距擴大。英超點解會好睇啊?咪就係阿士東維拉可以大勝利物浦7比2、曼城可以輸畀李斯特城2比5囉!他日英超變成拜仁獨大的德甲,球迷們唔好喊啊!

好彩,人民嘅眼睛係雪亮嘅,英國球迷嘅眼光係長遠嘅!就連利物浦同曼聯嘅球迷都反對呢個計劃,可想而知亨利、格拉沙家族幾咁離譜,更過分嘅係,兩家球會向來係世仇,家下竟然聯手搞禍英超!去問任何一位紅軍或紅魔球迷,都唔肯過佢啦!

「哼!哼!」達聞西講到呢度要冷笑兩聲。美帝嘅狼子野心路人皆見,又點會由得你哋搞亂個行業啊!首相約翰遜已經公開表示反對,加上之前沙地阿拉伯財團想入主紐卡素都被否決,亨利同格拉沙家族都係慳番啖氣暖下個肚啦!

哎,亂世之下原形畢露,係忠係奸通通現晒形,等到世界恢復正常,到時再慢慢同你哋計數。亨利、格拉沙們繼續末世瘋狂,張單遲早要你找番數啊!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads