熱門:

2020年9月17日

達聞西 競技研究所

要人冇人 要蚊冇蚊

「凡事都有定期,天下萬物都有定時。」呢句說話真係警世啊!巴塞隆拿2010年踏入羅素同巴杜美時代,就開始摒棄傳統展開「發財大計」,10年過去竟然淪落到冇錢買人嘅地步,搞嚟搞去最後一場空。

巴塞球衣胸口贊助向來唔賣,最多幫聯合國兒童基金會做宣傳,點知羅素同巴杜美一上台,就推翻傳統賣畀卡塔爾航空,之後再換上日本購物網樂天。巴杜美月前仲話要賣魯營球場個冠名權,可以講係喪心病狂!

好彩,董事局睇嚟唔係幾合作,加上世界經濟低迷少咗買家,結果搞到巴杜美今夏窮到冇錢買人。法甲里昂主席奧拉斯就爆料,話巴杜美親口承認冇錢買荷蘭國腳迪比!之前買人億億聲嘅巴塞,連3000萬歐羅都拿唔出?真陰公!

黑開就有條路

達聞西只可以講:你都有今日啦!呢幾年巴塞真係好陌生,菲臘比古天奴、奧士文尼迪比利、基沙文個個都貴到離譜。結果貨不對辦成績差,加埋新冠疫情嘅打擊,終於搞到周身冇蚊,今季想話盡地一煲,結果搞到冇米落鑊。

黑開就有條路,本來「阿蘇」蘇亞雷斯去到祖記嘅話,都可以幫補下買迪比嗰條數,結果又因歐盟護照問題告吹。朗奴高文之前打電話通知「阿蘇」搵定下家,如今買唔到迪比居然低聲下氣,同「阿蘇」講留低嘅話照樣重用。

睇嚟巴塞真係山窮水盡,烏拉圭球星卡雲尼曾經提出免費加盟,結果巴杜美都唔敢要,皆因自由身球星人工都好高,巴塞陣中位位都係高薪人士,又點負擔得起呢?布斯基斯呢類高薪老臣子又有長約喺身,幾歹同你鬥長命啦!

所以,巴杜美同朗奴高文再隻手遮天,都奈呢班球星唔何,好似阿蘇出動八人大轎子都冇用,據講只要有球會肯買佢嘅話,人工少幾多巴塞畀番晒!由此可見,巴塞方面幾咁想散貨籌錢;10月5日轉會窗關閉前,唔知換到幾多新血呢?

球星如雲嘅巴塞,美斯、布斯基斯、碧基等老臣子唔妥高層,柏迪、法蘭斯高查卡奧等新仔又未孭得起隊波,今季都咪話唔凶多吉少。巴杜美落台幾成定局,希望場外醜聞可以少啲,等巴塞個招牌不至於太污糟。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads