2020年9月5日
愛嘅反面就係恨,愛得愈深傷得愈深,激情過後手尾打晒結,好似近日某前DJ嘅婚外情,就搞到網上論壇立立亂。所以話,凡事要保持少少距離,唔好一廂情願,唔好感性蒙蔽理性,咁先可以你好、我好,大家好。
好似港產足球新星戴偉浚咁,今季登陸中超深圳佳兆業表現唔錯,最近接受訪問暗示搞緊入籍,希望將來可以代表國足,仲視國足老大哥鄭智為榜樣添!本地球迷當然唔多高興啦,覺得呢位21歲球員係反骨仔。
浚仔13歲就過英國讀書踢波,之後簽咗新時代環球體育管理公司,間公司成立於2007年,老闆係摩拉利,團隊包括費迪南兄弟等。目前最出名球員係愛華頓中堅米高堅尼,市場價值2000萬英鎊,堪稱鎮店之寶。
50多位球員中浚仔地位唔高,根據《Transfermarkt》網站,身價50000英鎊,經理人公司網站亦未更新,顯示佢効力球隊依然係狼隊,而唔係深圳佳兆業。公司網站標榜新時代新做法,場內場外都照顧周到,浚仔就主攻內地市場。
內地球員機械式
從經理人公司角度,如何提升球員價值,為公司帶來利潤最重要。自小離港嘅浚仔,喺市場至上嘅運動新時代洗禮下,又點會講衣錦還鄉、愧對江東父老啊!何況,係人都知代表國足,從名利考慮都係上上之選。
所以,香港球迷失望歸失望,千祈要識得放手,唔好似其他國家球迷咁,郁下就民族情緒上頭,何苦呢?達聞西希望浚仔喺中超可以飛黃騰達,他朝有日帶領國足衝入世界盃,到時香港球迷實會為佢打氣嘅,大家話係唔係啊?
達聞西睇好中超孖仔浚仔同樂仔陳俊樂,因為佢哋都係好聰明嘅球員,呢種特質內地球員最缺乏。前天津權健隊嘅葡萄牙教練保羅蘇沙,最近接受訪問時就批評內地球員好機械式,一味等教練落柯打,落場唔識閱讀球賽。
香港球員身材可能差啲,但肯定係靈活嘅醒目仔,希望將來更多港足小將登陸中超,喺外國教練調教下更進一步,咁樣對香港足球最有利;當然,最好梗係着番港隊波衫啦,不過好多嘢冇得強求!
放大圖片 / 顯示原圖訂戶登入
下一篇: | 絕殺「塞」翁 |
上一篇: | 周四主要足球賽果及主要足球賽程 |