熱門:

2020年8月17日

達聞西 競技研究院

亂世出紅牛!

古人見到毛鬙鬙嘅人,好似心口生晒毛嘅李逵、張飛,就覺得佢哋一定好大膽,於是形容沙膽嘅人「膽生毛」!大家睇過巴塞歐聯慘負拜仁2比8,英超、西甲、意甲缺席歐聯四強,又會唔會嚇親呢?其實諗深一層,有幾奇?

今季喺新冠疫情下,一場過決勝負,球員狀態不穩,加埋內部矛盾加劇,輸個大大鑊唔出奇。

巴塞大敗唔算天崩地裂,2016世盃主辦國巴西不敵德國1比7,真係海嘯級啦!不過,兩次名牌大屠殺都係德國人經手,可見日耳曼民族幾不近人情!而杜慈、費歷克、拿格斯文3名德國教頭躋身歐聯四強,亦係另一驚喜之處!

黑馬之相

大家有冇發現,加埋利物浦嘅德國領隊高普,呢批德國教練團都打進攻足球,都從中前場開始壓迫對手,令達聞西諗起教過拜仁嘅哥迪奧拿,真係顛覆晒德國足球文化。如果「阿叔」林尚義在生,唔知唔會慨嘆:「德國波嚟㗎?」

全球化下文化相互踫撞,加上資訊科技發達,一啲新玩法好易成功。你睇燒錢燒到幾乎罰停賽嘅曼城,八強對住里昂又輸波,再次無緣歐聯四強。卡塔爾王室入主多年嘅巴黎聖日耳門,今年都係易主後首次入四強。德甲嘅RB萊比錫最巴閉,2016/17球季升上德甲,今季轉會淨支出2400萬歐羅,結果第二季打歐聯就入四強!先喺十六強淘汰上季亞軍熱刺,八強再擊敗2014、2016年亞軍馬德里體育會,前後踢嗰17場歐聯比賽。

RB萊比錫改寫球壇潛規則,幕後大佬係奧地利某能量飲品,佢哋響各國成立紅牛幫,從奧地利薩爾斯堡、美職聯嘅紐約紅牛,到巴乙嘅巴西紅牛。呢個人才網絡令各隊資源共享,唔使燒銀紙同傳統勁旅爭奪球員。

近年喺薩爾斯堡踢到曉飛嘅黃喜燦,新球季將着上RB萊比錫戰衣,轉會費得900萬鎊,轉會費僅900萬鎊,過幾年轉投英超等勁旅,又可以大賺一筆。好似淘汰馬體會射入奠勝球嘅美國球星泰拿阿當斯,又係2018/19球季由紐約紅牛加盟。

所以辦法總比困難多,冇咩高牆係高不可攀,推佢唔倒咩?鑽個窿捐過去囉?再唔咪,行過幾步繞過佢囉!有膽又有腦,使咩驚啊?

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads