2020年7月10日
世界大亂,容乜易得罪人呢?事後道個歉,第朝咪太陽照常升起囉!不過,正所謂打牌睇人品,沙冧何嘗唔係呢?日前有位叫大大力嘅導演,喺臉書道完歉狂出Post,以為打沉份聲明網民就睇唔到,結果上埋報添!
道歉,要搞清楚自己錯喺邊,如果唔係就會心不甘、情不願,結果會更加犯眾憎㗎!塞爾維亞網球巨星迪祖高域上月搞慈善網球賽,導致自己同多名球員、教練確診新冠肺炎,搞到要鞠躬道歉!
達聞西知呢條友炮仗頸,肯定唔係誠心道歉,果然,佢同太太病毒測試陽轉陰後,恢復操練受訪來個大反擊。「呢排,我只聽到惡意批評,明顯成為一個社會議題,就好似黑暗時代嘅獵巫行動咁!」
咩話?你喺疫情未受控下,搞個違反抗疫令嘅慈善網球賽,結果引致咁多參與者染病,外界批評下就叫獵巫?批評又點分善意同惡意呢?大家無非係為抗疫,見到一啲激少少嘅留言,就扮受害者啊?
網壇一哥仲未呻完啊!「名人係世人眼中嘅罪魁禍首,一定要鬧到佢趴地先高興!我等其他人評論公唔公平!自己就覺得唔多公道。大家要從呢件事當中學習,放低過去向前看。」迪祖高域講。
照我睇啊!你迪祖高域先係冇汲取教訓,係典型嘅「講你又唔聽,聽你又唔明,明你又唔做,做你又做錯,錯你又唔認,認你又唔改,改你又唔服,服你又唔講。」不過,佢嘅case係認完錯又鬧人!
支持復賽
邊個唔想好似以前咁呢,一個唔使戴口罩嘅世界?問題係未有疫苗同解藥,咪要保護好自己同其他人囉。喺迪祖高域眼中收入更重要,「雖然我冇金錢煩惱,但鼎力支持恢復比賽,因為好多球手靠比賽為生。」
問題嚟啦!記者問參唔參加8月嘅美網,佢答:「暫時未知,但我會參加9月嘅馬德里、羅馬、法網賽。」點解唔去美國參賽呢?係咪覺得當地疫情未受控啊?乜唔係要支持其他參賽球員咩?
好多網民講得好啱,「毫不負責任!大家係擔心疫情,唔係關你出唔出名事!既然道完歉,就唔好出來發噏瘋,咁樣好破壞形象㗎!」係囉!打要企定,駁嘴咪盞打多兩籐?
放大圖片 / 顯示原圖
訂戶登入