2020年6月24日
未富先驕,呢四隻字,達聞西特別有feel。大約10年前祖國忽然有錢,好多大陸人同官媒就用呢句話鬧香港人!真係識就笑死,唔識就激死。到咗2020年,大家清楚邊個先係未富先驕啦!
不過,未富先驕唔係某啲人專利,阿仙奴防中古安杜斯就係其中之一啦!佢上場聯賽1比2不敵護級球隊白禮頓,成場波都侮辱對手:「你班垃圾,你哋將來再努力,都冇可能有我咁高收入!」
據講,呢個21歲法國土豪球星,以前落場成日咁奚落對手,呢次針對射入奠勝一球嘅法國同胞馬奧比。達聞西查過馬奧比舊年以2000萬鎊加盟,周薪5萬;古安杜斯就2018年夏天以700萬加盟,周薪4萬。
講嚟講去,原來馬奧比人工同身價都高過古安杜斯?所以千祈唔好出口傷人,真係好面懵㗎!從奧斯爾高薪hea踢,隊長格列沙加爆粗鬧自己球迷,到古安杜斯以人工蝦人,可見阿仙奴嘅價值觀經已錯晒!
根據今季英超人工排名,阿仙奴以1億歐羅排第4,僅次於曼聯、曼城、利物浦,但聯賽排名就得嗰第10位;聯賽排名倒數第6嘅白禮頓,全隊人工以4000萬歐羅排倒數第5位。大家話邊隊對得住球迷同老細啦!
過去啲人話高薪可養廉,或者有錢使得鬼推磨,呢啲理論到咗21世紀已經唔work。阿仙奴領隊阿迪達都以為球員人工高咗,就會更投入踢好波、爭好成績,但原來好多球員根本志不在此,踢波已經變咗係副業。
志不在踢波
阿仙奴的問題尤其嚴重,好似西班牙後衞比利連成日着到鬼五馬六扮潮男,奧巴美揚就例牌玩跑車。呢啲興趣冇錯係個人自由,但球隊戰績差成咁,係咪要擺多少少精力落足球度呢?你睇,一復賽又兩連敗啦!
不過,好多叻人強國喺工作冇建樹嗰陣,都會吹噓當年考試年年考第一,又或者充大頭鬼買遊艇豪宅,甚至年年做大個GDP扮盛世!可惜啊!呢啲掩眼法呃到外人,最弊連自己都呃埋,搞到無知又自大。
放大圖片 / 顯示原圖
訂戶登入