熱門:

2020年6月1日

達聞西 競技研究院

執法者.白勝雪

好似球證、警察呢類執法者,真係時刻要保持whiter than white,有咩行差踏錯摧毀形象,真係影衰成team人。斯洛文尼亞頂級國際球證雲斯錫,日前捲入跨國賣淫集團醜聞,雖然佢以目擊者身份受查,但專業球證形象盡毀。

呢個警方智破賣淫集團案件,涉及斯洛文尼亞、波斯尼亞、塞爾維亞三國,由集團女boss兼塞爾維亞網紅艾芳安排,帶班靚女坐船去波斯尼亞嘅比謝真拿,其他人由其他國家出發,打算喪玩兩日兩夜,艾芳預計呢次賺到8000歐羅。

點知波國警方採取「水晶行動」,大舉破門而入:「咪郁!警察!」當場拘捕9女26男,搜獲14袋可卡因、10把槍、3件避彈衣、價值1萬歐羅嘅外幣。多名男子有啲趴地、有啲坐響床,其中一個係知名球證雲斯錫。

球證生涯亮紅燈

真係水洗都唔清啊!雲斯錫就話自己清白嘅,不過係以目擊者身份受查,「我當時傾完生意,受邀去到呢家農莊,冇耐就衝入一隊差佬,我一路話唔識得佢哋!」呢位40歲嘅球證一副無辜狀。不過又好難解釋得通,疫情下偷出國去參觀農莊?

雲斯錫嘅解釋只係證明到一樣嘢,就係的確同賣淫集團無關,之但係做咩又唔見達聞西喺現場呢?咩生意拍檔帶你去咁嘅農莊,而又咁啱入邊開緊「動物派對」呢?咪唔記得現場保安嚴密,有多名持槍保安保衞喎!

正所謂君子不立危牆之下,正常人見到勢色唔對就借尿遁啦!而且,根據警方消息,呢個集團活躍多時,女boss艾芳更係老江湖,唔揀自己主場塞爾維亞,選擇較偏僻嘅波斯尼亞東部城市!呢班尋芳客亦都係老馬識途之輩嚟。

雲斯錫相信冇咩大手尾,不過球證生涯肯定留低污點啦!斯洛文尼亞球證會主席沙恩發聲明,話雲斯錫不過係喺錯誤嘅時間出現喺錯誤嘅地方,「不過唔理咩原因被捕,都無可避免對執法生涯帶來打擊。」到底會有咩打擊呢?真係拭目以待啦!

「錯誤嘅時間出現喺錯誤嘅地方」,其實個個都可能面對呢種情況,不過最緊要嘅係唔好做咗錯誤嘅事,如果唔係將來一定會被追究!執法者除咗要分清黑白,仲要比雪更加白啊!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads