熱門:

2020年4月6日

達聞西 競技研究院

懶醒豬頭炳

上回講到球會同足總高層,借新冠疫情趁「疫」打球員荷包,以為自己好醒,其實不過豬頭炳!最新醜聞係,榜首球隊利物浦利用政府嘅「無薪假計劃」,將非足球部員工八成人工,轉嫁畀英國嘅公帑嚟支付,結果畀人鬧到飛起!

大佬啊!政府體恤疫情下嘅困難企業,利物浦成績好兼賺到豬籠入水,仲好意思學中小企攤大手板?唔怪得連紅軍名宿加歷查都鬧埋一份:「高普呼籲防疫,球員做善事回饋社會,點知班膠層做埋啲咁嘅嘢,簡直係拆自己招牌!」

紅軍問政府度水!

懶醒者何止係紅軍?上周五個英超聯視像會議,與會高層向球員代表提出減薪30%,當堂就畀奇雲迪布尼、麥克盧保等球員代表反對!「我哋寧願畀錢醫護人員,都唔會幫班大富豪班主!」的確,減薪幫唔到抗疫,只係幫班主慳錢啫。

利物浦隊長佐敦軒達臣就聯合其他隊長成立「英超應急基金」籌款,所得全部用來支援前線醫療人員!至於其他球星都不斷做善事,送口罩嘅送口罩、捐錢嘅捐錢,最懶嘅都拍片同球迷打氣啦!所以話,親力親為回饋社會唔好咩?做咩要假球會高層之手?

據講,與會球員同高層講:「球員都願意幫手抗疫,好多私底下已經做緊添!球會由大有錢佬持有,我哋點解要幫佢哋呢?」講得太好啦!好似紅軍個美國班主亨利咁,大把錢當隊波係玩具,如今個市短期差少少,就打球員嘅主意?

英格蘭球員工會(PFA)最新講法更加係「突破盲腸」,「未來12個月減薪30%?代表乜?除咗球員損失5億鎊人工外,政府薪俸稅唔見2億鎊啊!政府收少呢筆錢,對前線醫護影響幾大呢?衞生大臣夏國賢有冇諗過呢?」達聞西都好想睇下「夏臣」點回應啦!

係咪全世界政治人物都咁低層次呢?比如講得出上街遊行人數和次數上升,代表個城市仲係好自由呢?天啊!呢班天才人工高做唔到嘢都算啦!你咪好好哋匿埋office數銀紙,或者炒下股囉!做咩要出來講嘢挑釁市民呢?

時艱當然要共渡啦!但大企業要知道人民眼睛好雪亮,借頭借路炒員工呢?就算係六星級大酒店,遲早都會變大賓館!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads