熱門:

2020年3月25日

達聞西 競技研究院

疫來順受 抗逆有法

如果禁酒可以抗疫,咁太多嘢要禁啦,起碼夜店、娛樂場所要熄燈落閘,我哋位「學霸」娥姐實在能人所不能,全世界冇人諗到佢諗緊啲乜,包括世紀蠱惑新冠病毒,相信香港好快會零病例啦!

講起讀書叻,達聞西好佩服香港班家長,佢哋一定好似娥姐咁年年考第一!乜解究?因為全港停課下,班家長依然好緊張子女學習,好有天跌落嚟都要刨書嘅決心。達聞西讀書嗰陣hea得就hea,當然唔明佢哋嘅心態啦!

美斯教人點抗疫

其實學習唔係為面對新世界咩?當今世界股市跌、疫情橫行、經濟低迷、隨時升起硝煙,呢種末世感覺係災難電影至有,連歷史教科書都未見過,如今出現喺現實世界,有咩好得過從生活中學習啊?仲Zoom乜鬼啊!

讀書無非為安身立命,為家庭、為社會帶來安定,西班牙球星法比加斯就有感而發:「踢波咁多年,都未試過同班仔女一齊食早餐、午餐直落到晚餐,然後抱埋佢哋上床瞓!呢個係隔離期間最難得嘅收穫,大家話係唔咪啊?」

呢點達聞西同意到極啊!尤其我哋做傳媒,打風落雨、和你塞等等,都要堅守崗位。如果抗疫時期可Home Office,相信好多傳媒人都會唔慣,然後忽然間有法比仔嗰種「原來阿女開始搽口紅」嘅開心大發現。

巴塞隆拿球星美斯就呼籲家長們,喺疫情下要保持冷靜,「如果大人都失控或恐慌,咁小朋友就會更加冇安全感。喺呢個前所未有嘅環境,小朋友亦會經歷其中恐慌,我哋要以身作則,教佢哋點樣安然面對眼前巨變。」

場上異常冷靜嘅美斯,仲教埋大家要點做:「用佢哋嘅語言溝通,用佢哋明白嘅方法講解,傾下世界發生緊嘅事。」呢位聯合國兒童基金會大使不忘賣告白:「更多幫助小朋友資訊,請大家上UNICEF網站瀏覽。」

達聞西希望香港家長同小朋友,一齊多啲上網學習啦,唔好依賴學校透過Zoom教學,呢啲課本知識唔難掌握,難得遇上全球危機事件,點解唔學下點應對危機同控制情緒。乜話?有無證書考?升中有冇分加?冇㗎!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads