熱門:

2020年3月2日

達聞西 競技研究院

泳壇丁蟹

花名「紫尿楊」嘅中國游水名將孫楊, 上周五被CAS(國際仲裁法庭)重罰停賽8年,理由係唔遵守WADA(世界反興奮劑組織)嘅規定,喺2018年9月4日當晚叫實Q打爛支血液樣品,由於係第二次違反有關規定,決定予以重罰!

孫楊事後嘅反應好「丁蟹」:點解你哋要咁對我啊!「我感到震驚、憤怒,不能理解!」CAS份聲明好清楚,你懷疑檢驗人員資格都好,都唔使搵人打爛支嘢啊!即係你個concern同反應係南轅北轍,人哋唔話你身有屎都算係咁啦!

唔知自己衰乜

達聞西懷疑孫楊一路都唔多理解呢個世界,比如點解攞過奧運同世錦賽金牌,都得唔到業界尊重呢?法國選手拉確特笑佢「紫尿人」、澳洲嘅霍頓話佢係騙子、英國無名小卒史葛拒絕同場領獎……點解世界第一都要受「歧視」!

點解?咪就係無品囉!服用禁藥已經唔啱,仲注射埋精神「興奮劑」,一朝得志語無倫次,舊年當住全世界對史葛講:「我贏,你係失敗者!」又上電視諷刺霍頓:「游快啲,咪飲到我美味嘅洗腳水囉。」

有咩國家就有咩國民,愈強大愈要懂得謙卑,對世界負更大責任,而唔係周圍蝦蝦霸霸。當然,孫楊悲劇亦係國家文化下嘅結果,全國上下一面倒金牌掛帥下,佢過去醉駕或服用禁藥都從輕發落,呢啲就等同一路寵壞緊個大細路。

孫楊亦變得不擇手段,好似呢次事件為證明自己清白,喺微博展示藥檢人員信件時,對方身份證號碼冇打格仔,該武姓男子表示願意幫手做證,但希望保護個人私隱。結果,眼中得自己權益嘅孫楊,又點會顧及對方嘅利益呢?

孫楊上訴成功嘅可能性好低,運動生涯幾乎肯定畫上句號,內地網絡水軍紛紛出擊,甚至有律師接受訪問批評CAS,話應該限制藥檢人員嘅執法權。嘩!呢啲咁特別嘅思維同言論,孫楊律師團隊上訴嗰陣千祈咪照講,唔係就貽笑大方啦!

28歲嘅孫楊成為末路國家英雄,網上輿論開始轉風向,《環球時報》老總胡錫進都話唔好將孫楊問題同國家榮辱畫等號。睇嚟孫楊呢對一次性筷子係時候拋棄啦!希望佢早日理解呢個世界,上岸後做番個清清白白嘅男子漢啦!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads