2020年2月26日
科技到底好定唔好呢?好似發明智能手機咁,好似方便人與人溝通,結果卻係人人機不離手,老友聚會都各自望自己手機,落得個相對無言嘅情況。最近,英格蘭、愛爾蘭、蘇格蘭足總發表聯合聲明,足球教練唔好畀11歲以下球員頂頭槌!
呢份聲明係醞釀已久,皆因格拉斯哥大學調查過前職業足球員,發現佢哋腦部疾病嘅死亡率係普通人3.5倍。其實,類似嘅研究呢10年都發表過好多,不過由足總親自落指示基層教練,影響範圍包括所有小學足球培訓,就認真唔講得笑。
據講,英倫三島除威爾斯地區外,小學雞受訓避免頂頭槌外,12歲以下每個月一堂頭槌課,每次次數唔可以多於5下;13歲以下就可以每周一堂,同樣係5下以內。不過,該指引只係同訓練內容有關,唔包括少年足球賽。
前熱刺球星奧哈拉聽到個消息,好似達聞西咁大叫一聲:「有冇搞……錯!」,佢話:「頭槌係出色球員必備嘅元素,如果球員細個唔畀頂頭槌,又點識得掌握呢項技術啊!」基本功係咪好似學外語咁,趁細個學愈好呢?真係天曉得啦!
不過,有樣嘢就肯定大受影響,就係英倫球員引以為傲嘅頂上功夫,好可能喺10幾年後失去優勢。大家睇波都知,英國人踢波係橫衝直撞,全靠死球戰術高空轟炸,第日要同巴西、阿根廷鬥地面進攻,真係唔輸夠十個一皮都難啦!
禁頂頭槌
當然,英倫三島足總會駁話,人哋美國早響2015年已經禁止10歲兒童頂頭槌,11歲至13歲亦有特別指引,避免腦震盪或者第日老人癡呆。講真,如果頂頭槌都要規管嘅話,拳擊運動咪要明文規定唔準打頭?欖球運動都要取消轉玩美式足球!
達聞西畀人研究咗咁多年,偶爾都會覺得好多研究,係為咗研究而研究嘅。足球員死於腦部疾病風險高?有冇分析佢係中堅定中場啊?有冇計算佢足球生涯頂過幾多球啊?究竟係頂波導致震盪,定跌落地撼親個頭呢?
講開對個腦嘅損害,有咩大得過智能手機啊?你試下呼籲小朋友唔好玩手機,睇下佢哋肯唔肯過你?做人千企咪阻頭阻勢,阻住個地球轉啊!
放大圖片 / 顯示原圖
訂戶登入