熱門:

2018年11月28日

陳心遙 視線所及

白色專輯

今年嘅11月原來係披頭四俗稱嘅《白色專輯》(White Album)面世50周年。封套玩完Sgt. Pepper's Lonely Hearts Band經典嘅眼花繚亂百頭圖之後,竟然回歸到乜都冇,簡無可簡得空白一片做封面,好似預示由熱鬧歸向寂靜嘅披頭歲月一樣。

我記得我喺讀大學嘅時候,係特登走去圖書館聽黑膠嘅。專輯入面大部分嘅歌,都係披頭四喺印度跟一位瑜伽大師學習冥想嘅期間寫。張碟同其他披頭四專輯最大嘅分別係:因為各種原因好多歌都唔齊人。錄音期間,兩個主創連儂同麥卡尼根本喺兩個Studio分開錄音;連儂同小野洋子正打得火熱,成日缺席唔出現;史達因麥卡尼嘅批評又離開咗幾日;麥卡尼又鍾意自己彈晒啲嘢(衰在佢又有呢個能力);搞到隊Band支離破碎,似係四個人各自各Solo再搵另外一人、兩人或三人配奏咁樣。

雖然講到咁,但隻碟嘅作品似係百花齊放,曲風涵蓋民謠、流行、藍調、古典、迷幻、搖滾、金屬,以至前衞;至今好多歌仲為人津津樂道。最重要嘅首推While My Guitar Gently Weeps。披頭三子都分別係主奏或伴奏結他好手,但呢隻歌就前所未見搵咗夏里遜嘅好友,結他之神Eric Clapton彈Solo,令首歌嘅質素提升去另一個層次,至今奉為最重要嘅搖滾神曲之一。

Mother Nature's Son根本就等於麥卡尼單飛作品,係佢受冥想啟發,歌詞讚頌自然大地。同樣處境連儂寫咗一首對應嘅Demo叫Child of Nature,但冇做到變咗佢拆夥之後嘅名曲Jealous Guy。Revolution 1係連儂第一首反建制同時反思抗爭嘅Protest Song,簡單淺白、深入民心,佢同碟另一隻Revolution 9就係一首不明所以嘅聲效實驗作品,被唔少歌迷形容為不知所謂嘅噪音。BlackbirdJulia分別係麥卡尼同連儂二人純用一支木結他伴奏嘅歌;麥卡尼話Blackbird歌詞係受美國黑人運動所啟發,而Julia係連儂以佢幼年離世嘅母親為名而創作。

雙碟四面嘅《白色專輯》係披頭四時間最長嘅大碟,三十首歌總長超過個半鐘,係當年一隊紅遍世界嘅樂隊所製作嘅音樂盛宴,有如仙女散花,萬象紛呈,你可以話係冇風格雜亂,又可以話係隨心所欲。其實係四個天才橫溢嘅音樂人,由早期盛極一時到中期迷幻游離,而轉向沉潛內斂嘅轉捩點。樂隊眾人嘅音樂才華已趨成熟,各有一片音樂天空,以至走向分崩離析嘅一個起點。不過如果你係一個音樂初學者,唔理你係寫旋律、寫歌詞定學編曲,White Album肯定係一張可以令你茅塞頓開嘅佳作。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads