熱門:

2018年9月26日

陳心遙 視線所及

免費娛樂嘅大結局

喺一個商營嘅媒體工作,其中一樣要學嘅就係平衡節目內容同廣告。一來,政府對電子媒體廣告有嚴格規限,唔可以隨便將廣告內容滲入節目。於是巧妙地將訊息植入節目入面又唔犯例成為媒體營銷嘅一門學問。

有好多媒體實行「來者不拒」嘅政策,有錢就會幫你諗掂佢。但以往仲有少數媒體係唔輕易向廣告商,亦即係金錢屈服,堅持節目內容先行,謝絕廣告紛擾。因為即使技巧再好,廣告贊助訊息或多或少都會破壞節目趣味。以前嘅一套係咁行:你做個節目好聽,收視收聽率會高,民間有口碑,廣告商同agencies自然會正正經經喺廣告時段落廣告。首先擺脫枷鎖嘅係電台,廿幾三十年前開始已有大量贊助內容;仿效雜誌鱔稿玩法。但由於受廣管局條例監管,要左閃右避。錢賺到,但犧牲嘅自然係節目可聽性,聽眾減少,又需要更激進方法去吸廣告,形成一個循環。

之後到電視。一般人都覺得一個衣香鬢影嘅場合,一班藝員個個着得珠光寶氣,圍埋一齊,徒手食快餐烤雞突兀。畫面反差太大,絕對合乎廣告嘅本質,但就引嚟不少觀眾嘅強烈反感。觀眾都唔係儍嘅,一早明白媒體同受眾嘅契約內容,得到免費娛樂嘅代價就係接收廣告。但今時唔同往日,一街都係資訊、影像,泛濫到免費都要揀嚟睇,仲要我睇夾硬嚟嘅廣告?

近年搵錢最成功某個網媒,成立初期好多關於時事嘲諷,每個post,網民都瘋狂轉載。今日,佢哋大部分內容都係擺明車馬嘅廣告;仍然個個洗版。一來,新一代先唔理會係咪廣告,最緊要過癮。二來,習慣已成,同電視嘅慣性收視係同一道理。

一直以嚟,最忠心於大台嘅觀眾係邊個階層?係家庭主婦呀,市場俗稱師奶。好多賣家庭用品嘅客戶出去搞完一輪,最終都係返去大台嘅懷抱。照道理,係咪應該緊抱呢班忠實擁躉先。不過最近就傳出大台要摺埋嗰個人所共知,以家庭主婦為主要對象嘅午間節目,要變身做一個網購台。節目都未出唔知係點,不過斷估應該成個節目都係用「內容形式」介紹呢樣介紹嗰樣產品嘅廣告嚟。多唔多人想睇?大家即管期待。

我哋不如認真諗諗:免費娛樂終局會係點,唔係淨係針對電視。幾年前有一位時事評論員訪問我,佢都話電影嘅未來係咪應該變成免費娛樂,然後靠廣告去生存。我當下就解釋畀佢聽:呢個建議唔可行。唔使例子啦,全個香港都係活生生嘅失敗例子。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads