2018年2月14日
上個禮拜睇完《戰雲密報》,如果我冇睇故事簡介,又見到史提芬史匹堡、湯漢斯、梅麗史翠普呢啲響噹噹嘅名,我一定會以為真係「戰雲密布」嘅戰爭片或者科幻片。如果唔係咁,咁一定係「我的鬥氣冤家」一類嘅辦公室愛情大堆頭喜劇,張海報會係「兩大影帝影后作勢拗手瓜扮死對頭,男女背後各有五六個二三線串星打氣助陣」。電影世界,一線明星到五六十歲仲拍戲,演呢啲咪好囉,做乜拍埋啲又悶又嚴肅嘅題材呢?
好喇,睇完。雖則話電影係取材自美國七十年代初,關於「五角大樓洩密」嘅真實案件,但身為香港人嘅我,覺得劇情實在太無稽同荒謬,完全脫離現實:
一、作為一盤家族生意嘅大老闆,做乜梅麗史翠普飾演嘅嘉芙蓮,要下下受呢個總編輯湯漢斯嘅氣呢?接到白宮指示喎?總編輯唔聽自己支笛喎?仲低聲下氣請佢食個晏求佢?老總唔聽命令,即刻炒咗佢是常識吧!
二、然後爆咗單咁大鑊嘢,點解白宮要咁手忙腳亂呢?乜總統唔係三軍統帥嚟嘅咩?打緊仗喎?點可以擾亂軍心,即刻出動FBI、CIA同特種部隊包圍《紐約時報》同《華盛頓郵報》嘅總部,依法搶啲文件返嚟都得啦?
三、仲可以俾佢哋告上最高法院,堅持要出版嗰啲越戰內幕俾公眾知道?乜法院唔係直屬美國共和黨嘅咩?尼克遜點解唔即刻命令最高法院嗰啲美籍法官,限報館10分鐘之內交出文件同埋交出洩密者,否則封館拉晒全部人呢?唔通法院入面又有外籍法官?唔明唔明⋯⋯
四、法庭外面竟然有群眾起哄,「支持公眾知情權」?就算唔即刻出防暴隊鎮壓,至少都應該有另一班群眾同時嗌「打倒美奸肥婆嘉芙蓮」咁先正常㗎嘛。
五、第二日,竟然全國各地嘅報紙都跟進報道?呢個簡直離地三萬呎。乜各報館唔係應該尋日即刻四出行動,搵一單半單邊區爆水渠大塞車嘅猛料,或者半搵半作一條城中名流或藝人嘅情色醜聞,擺喺A1頭條㗎咩?做乜要跟人呢?冇編輯自主㗎?
睇完呢部戲真係十萬個「黑人問號」,我推薦所有做傳媒嘅朋友或者讀新聞嘅學生都應該去睇,當係一道反面教材。入面所講嘅絕對唔係咩新聞自由,「喺消防員救人之前hold住佢做三分鐘直播」先係新聞自由嘛。出唔出一單新聞,有傳媒自己嘅「採訪政策」,唔需要同你解釋㗎。呢啲先係新聞自由嘛。
最後hashtag埋「曲線唔講明」。祝大家狗年進步。
訂戶登入
下一篇: | 幸災樂禍心理學 |
上一篇: | SpaceX的2018太空漫遊 |