2017年12月13日
一直都覺得香港太少好似《冧歌有情人》或者《一奏傾情》咁,以歌曲或音樂做題材嘅電影。以近年港產片有限嘅資源,要將悠揚嘅音樂同優美嘅影像二合為一,呢個任務一啲都唔易。上個禮拜睇咗馮志強導演嘅《大樂師.為愛配樂》;心諗終於有人做到一部出嚟。
金培達嘅配樂出色就唔使多講。故事改編來自馮導演自己嘅小說,上面提到嗰兩套西片,故事嘅主人翁都係作曲人、音樂人呢類。《大樂師.為愛配樂》不落俗套,有勇氣用綁架案去包裝。一來連喺香港發生嘅正宗犯罪片都愈嚟愈難說服觀眾,二來仲要將音樂聯繫就更難。好在電影嘅主場景,嗰一個遺世獨立、質樸但又陳設細緻嘅漁排,將故仔從沉悶嘅現實世界抽離,一堆手作嘅Cigerbox結他、破爛嘅舊鋼琴,仲有風一吹就噠噠作響嘅木塊、玻璃樽,喺電影世界都變成一件件樂器,奏出治癒人心嘅樂曲。
電影嘅缺點就係:佢唔係大家熟口熟面嘅類型片,有年輕演員顏卓靈、白只,但唔係青春勵志,有鄭中基又唔係爆粗搞笑;好有女人味嘅周秀娜今次係不苟言笑嘅嚴肅女督察;連一向喺電影圈入面都係大壞蛋嘅何華超,喺戲入面仲有一場別開生面嘅現代舞演出。唔講大家未必知,何華超係一個好出色嘅舞蹈員同舞蹈老師,而家好多Dancers都係佢徒弟嚟。當大家都願意跳出框框去真誠表現另一面嘅自己嘅時候,電影應該就會不落俗套。
作為一個創作人,我從來唔懷疑音樂嘅力量。只可惜我哋聽到有關「音樂治癒人心」嘅有趣故事好多都係來自外國。香港嘅音樂力量一直被廣大嘅香港人局限咗喺流行樂壇,以至大家有意無意都將香港音樂等同流行樂,其他古典樂、室內樂、粵樂都唔覺意被劃分為「藝術」、「小眾」、「另類」。只要將耳朵張開,我哋就會知香港嘅音樂其實係百花齊放,冇百花齊放嘅係我哋嘅耳界,同埋音樂人嘅收入來源。呢個同香港嘅教育、仲有傳媒有好大關係。
《大樂師.為愛配樂》入面有句說話:「音樂可以帶你睇到另一個世界,見山不是山,見水不是水。」要走入另一個世界,音樂只係一把鎖匙,打開咗一道門,關鍵都係要我哋自己肯邁出腳步,去想像,去接受未聽過未見過嘅新事物。音樂如是、電影如是、政治經濟文化也如是。唔好睇少呢份力量,一個城市嘅病係源自城市入面每一個人嘅病。希望多啲音樂同電影會成為治癒我哋嘅佳藥良方。
訂戶登入