熱門:

2017年9月25日

蘭詩 視線所及

大陸樓按邊度遺產法分?

香港律師會舉辦的法律周2017,內容包羅萬有。一班愛心滿載的義務律師,無懼小房間如sauna一樣的高溫,一連兩日在時代廣場地面提供免費法律諮詢服務。

市民反應熱烈,義務律師「client」一個接一個,講到無停口!其中最熱門的問題是關於遺囑及遺產分配。所以今天也與fans,在此開心share其中一些這方面的知識。

如何做一份有效遺囑,之前已經寫過,所以選了兩條未寫過的。

問題一:「我係香港人,除咗香港有asset,亦喺內地買咗樓。咁喺內地嗰啲係咪都係按香港法律嚟分配?」

答案:

如果遺產唔係全部喺香港,又或者死者bye bye時居住地唔係香港,咁遺產裏面不同嘅部分,可能受不同法律所管轄。一般嚟講,遺產中嘅「不動產」(例如樓、屋或土地),唔理死者生前住邊,一般由不動產嘅所在地嘅法律管。例如深圳間樓嘅繼承就按番內地嘅法律。

而財產中嘅「可動產」(例如銀行存款、股票或珠寶等),無論所在地喺邊,一般都會受死者死時居住地嘅law管。例如死者移咗民去溫哥華長住,但留咗啲珠寶喺香港保險箱,咁珠寶一般會按加拿大法律決定點分。

不過,香港律師只可advise香港law。凡有關任何香港之外嘅法律,一定要向當地執業律師查詢先至穩妥。

問題二:「我同老公之前都結過婚亦同前度有細路,如果我老公無立遺囑,佢死咗啲嘢係咪會畀晒我同所有子女?我個女只係佢繼女,有份嗎?而我哋住緊間樓係老公單名,佢同前度生嘅仔會唔會有權趕我走呢?」

答案:

根據《無遺囑條例》,無論死者有無父母或兄弟姊妹在生,扣除死者嘅債務、稅項、葬禮同律師費用後,配偶先攞所有死者嘅個人財物(例如家具、電器、衣服、飾物、汽車),加剩餘財產中嘅50萬元。

如果仲有財產剩,就一半配偶,另一半平均分畀死者有血緣或已經合法領養嘅子女(不包括繼子女)。如果該子女已經畀死者行先一步仙遊,該子女嘅子女就可以頂上父母位置攞。

至於你老公間樓,如果係佢單名,一般嚟講,死咗就成為死者遺產嘅一部分。按《條例》,配偶有優先權分間樓以滿足佢應得嗰部分遺產,但如果佢應得嘅遺產不足以分得居所嘅全部業權,配偶就要能夠攞錢畀個balance,先至可以攞到間屋繼續住㗎。所以如果希望bye bye後,財產會按自己意願分配(例如想確保老伴可以繼續住喺本來間屋),最好都係立一份有法律效力嘅遺囑呢!

如果想再學多些法律知識,速速報名參加法律周10月20至21日於灣仔小童群益會舉行一連四場嘅免費法律講座啦。報名請電郵至 [email protected] 或致電3482 8698。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads