熱門:

2017年8月7日

蘭詩 視線所及

點先算黑工?

鳥神老婆生產力強,四年抱三!新婚不久的阿Dr,老公亨少是家中獨子,奶奶當然抱孫心切。但事業型的阿Dr卻說:「其實大肚9個月我都覺得應該OK,反而最擔心坐月同之後湊new born好困身。一定要從長計議,先可行動!」

席間有人提議:「我有個朋友個親戚喺鄉下落嚟幫佢坐月加湊BB,香港啲陪月唔多,不如我叫佢介紹俾你?」

我立刻說:「咪制呀!根據第115A章《入境規例》第2條,用訪客身份入境嘅人,係唔可以(1)接受有薪或無薪嘅僱傭工作;(2)開辦或參與任何業務;及(3)就讀於學校、大學或其他教育機構。否則,即屬犯罪,經定罪後,可處罰款5萬元及監禁2年。

「而請佢嗰個就觸犯第17I(1)條,即僱用不可合法受僱的人罪,可處罰款35萬元及監禁3年。

「另外,你呢個介紹人都有機中招!因任何人協助或教唆他人違反逗留條件,即觸犯《刑事訴訟程序條例》第89條及《入境條例》第41條,最高刑罰係罰款5萬元及監禁2年。」

立度說:「係呀!我睇news有個台灣女星同日本model,以旅客身份嚟香港出席一個龍友私影活動。因為兩個都無攞工作簽證,結果好似成班都拉晒,要坐監㖭!」

阿Dr驚訝地說:「吓,又唔係殺人放火,乜都要坐監咁大鑊㗎?」

我答:「係呀!差不多坐硬!因為喺『HKSAR v Ho Mei Wa(2004)』一案,上訴法庭就僱用黑工嘅判刑俾咗指引:(1)如果無其他加重刑罰或求情因素下,即使係初犯及只係短期僱用一名黑工,僱主都須被判即時入獄3個月;(2)若有其他加重刑罰嘅因素,例如有剝削成分或者僱用超過一名黑工、又或者已經唔係初犯,刑罰好可能會大大提高;(3)被聘請者係親戚或同鄉並唔係求情理由。

「好似喺剛才立度提個case,台星被控『違反逗留條件』罪。即使佢認罪,都被判監兩個月。

「另外,日本女模嘅經理人亦被控『協助、教唆、慫使或促致違反逗留條件』罪。而僱用女星嚟香港嘅搞手就被控『僱用不可合法受僱的人』罪。三個都唔認罪。佢哋辯稱話日模同經理人喺活動期間係自由人,可以隨時離開,所以大家唔算係僱傭關係。但法官唔buy,佢認為成個攝影活動一早就預先安排晒,而日模係呢個活動嘅重要人物,無可能係預佢可以隨時話走就走。而經理人亦為日模塗上特別液體令上鏡效果更好,又指示日模點擺pose,所以裁定三人之間係僱傭關係。所以罪成,判監2至3個月。」

亨少攬着嬌妻,望着老媽子說:「老婆,放心!我已經有個陀地nanny stand by,仲免費㖭!而家先知原來家有一老,真係如有一寶。哈哈!」

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads