熱門:

2017年5月31日

陳心遙 視線所及

拗嚟拗去

最近因為香港第一位女性登上珠穆朗瑪峰而引發網上的罵戰,由討論她喺山上是否見死不救嘅道德爭議,掀扯到山區服務登山者嘅「雪巴人」嘅權益問題,鬧得非常激烈。

另一邊,如果你同年輕人傾偈,你會發現佢哋呢個話題,或者其他所謂網上熱議冇乜感覺。因為喺另一種佢哋慣用嘅社交網站、手機程式,無論喺設計同習慣上,都唔方便對任何問題有討論,大部分以相片為主嘅私人生活日記。

隨便問一問呢個年齡層,不難發現,佢哋嘅訊息接收方法,同我哋完全唔同:唔睇電視、唔睇報紙、唔聽收音機、唔用臉書、唔上新聞網站,好少留意社會上嘅議題,因為佢哋嘅時間,大部分都俾返學同功課佔據咗,淨番嗰啲,就係補習同操卷。

千祈唔好以為我喺度做判官,又陳腔濫調咁話後生仔唔理個世界。錯!呢一代嘅好多人比起我輩同上一代都更關心世界同社會,有更多自己嘅諗法。不過近年好似愈嚟愈對前景冇信心,對社會上熱鬧沸騰嘅爭議覺得無聊沒趣,因為拗嚟拗去,都對現實世界唔會有咩實質改變。所以再唔可以發生,好似之前六、七年咁,可以喺社交網絡,一石激起千重浪嘅現象㗎喇。

喺網上討論問題,除咗真人之外,仲滲雜咗好多匿名、假名嘅人,佢哋討論嘅目的,唔係討論,而係消滅討論,無所不用其極撩起謾罵,盡快將理性辯論落入感性宣洩,再墮入人身攻擊,達致勢不兩立。明明大家都只係網上萍水相逢嘅陌生人,都變成好似曾經殺害對方全家嘅仇人咁嚟攻擊。而爭拗緊嘅,可能原本真係一個可以啟迪思維、益進民智嘅問題。睇到呢個現象,心入面真係覺得非常可惜。

部分原因,我覺得係大家將對政治同建制嘅不滿轉化。因為撼動不了高牆,所以暗暗覺得同自己立場不一樣嘅雞蛋,其實都係邪惡嘅幫兇,就連漠不關心嘅人,都係問題嘅罪魁禍首,就係因為你哋保守、犬儒嘅諗法,甚至只係因為你哋沉默,都應該對現今呢個困境負責……

嗯,或者係。但係其實無權、無聲、無票嘅人,好多都係制度嘅受害者。肯同你喺網上辯論嘅,除咗假人同埋五毛,至少都係肯思考問題嘅人,下下俾你用舌劍插到體無完膚,下次寧願收聲,珍惜羽毛,唔再發聲。新一代又對社會爭議厭煩,到你突然回頭,發現得番你一個獨對高牆,後悔就太遲喇。

和諧係一百種人有一百種說話,而且互相尊重。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads