熱門:

2016年3月12日

六角都市

買樓攻略

完全冇調查,冇研究,連中原城市指數都冇參考過,亦唔係因為銀行加大信貸,用上面的術語──剛性需求。都好,唔使理樓價點,要住,就買咗──兼且,應咗沖太歲破財。

不妨回顧吓成個心路歷程。首先,對於每日報紙見到的劈價、蝕讓,態度要保持審慎。阿媽教落,上得到新聞紙,都係新鮮事,個別事件。經紀話,通常都係突然爆一個超低價盤,圍內都覺得好抵,經紀會即刻通知相熟的客入貨,或者自己入咗。貿貿然行入一間地產舖,筍嘢應該輪唔到你。

睇咗幾個月樓,整體感覺係,筍盤好快有人承,諗多一晚先還價好多時就有人買咗,放盤試價的業主純「混吉」,好少肯減。話平話平,只係代表正常價又有心放盤的業主,可以稍為接受你講低多幾口價。我成日認住有大把香港人袋定錢好耐,個個蓄勢待發。

放棄執死雞,正經考慮需要。港島定九龍……定新界──都唔使理,最緊要係校網!老婆試過去港島西區睇樓,個業主話賣樓買番灣仔,因為嗰度甲級學額對學童比例最高──難為老婆從來只知道港島西區校網最好,冇諗過仲有呢條數,登時開始挑剔西區。

阿女因素

繼續都係為個女諗。個人比較鍾意近社區,其實西區好正,一落街乜都有,街坊仲好有人情味,但係老婆話:怕唔怕雜呀。屋苑環境單純啲。就係咁,我哋由西區睇到南區,南區有個中型屋苑,自成一隅,海景,港鐵年底通車,價錢合理。睇咗幾個單位之後問個經紀,附近多唔多嘢食,經紀答,樓下會所有間餐廳,我哋班行家日日食──咁即係冇啖好食啦──又唔得。

附加條件可以好多,但係講到尾都係睇「不直」,唔到你扮土豪。兩公婆打份工,供樓嗰筆多數冇問題,問題係首期。新樓發展商可以按高啲,就可以買貴啲,住大啲。呢個時候,「阿女因素」又再次浮現。

「個個都睇樓價跌喎,首期兩成,一個唔覺意變咗負資產,我哋是但一個冇埋份工,咪好大煲。」老婆話。都啱,做父母理應要保守啲。

600萬元的問題,最後答案:買咗港島區校網唔錯的一個兩房單位,屋苑,唔算太舊,因為係600萬元,可以借足480萬元,等於兩成首期,印花稅各樣慳啲,可以擺少少錢去執好少少間屋。個個都睇樓價跌,老婆話,留番一半首期,再跌可以買多層,升就可以換樓,進可攻,退可守。精明呀,如果人人都咁諗,個個袋住錢等入貨,樓市怕且有排都唔會跌。

Simon@6角都市

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads