熱門:

2018年5月17日

方卓如 方如玉帥

沒有最恐怖 只有更恐怖

騰訊(00700)業績交到功課,股價今日將會反映,最重要係重建了業績依然高速增長嘅信心。但記住,千祈唔好跌入價值陷阱,最緊要睇有冇momentum。有盈利或有增長嘅公司,股價唔一定升,否則點會出現activists,就係要狙擊股價唔反映業績嘅公司。盈利同增長可以帶動momentum,後者先係推高股價。騰訊自從大股東出售股票之後,已經唔再係節節上升。第一季業績係咪可以從此就回復momentum?

新地(00016)高價投地,令附近二手樓出現封盤。發展商唔再用麵粉整麵包,轉為整蛋糕,券商預期地盤落成之後,每呎要賣3萬;作出如此預期嘅分析員,相信佢係未買過樓,而家天鑄賣幾錢一呎?3萬幾近4萬。佛光街喺愛民邨隔籬,附近係冇大型商場,冇配套,都俾發展商可以搓到件蛋糕變成豪宅發售。啟德未來係重點大型發展區,商場同商業配套齊備,連同九龍城同新蒲崗,自成一國。3年後呢件蛋糕,會賣得平過天鑄?分析員發緊夢,每呎賣5萬就差唔多。

地產數同股票數好唔同,股票數易計,直線,供求,資金流。地產唔同,因為股票可以狂印,地皮係冇得啤出來,件件地產項目都好似藝術品,賣一件少一件,要估計邊個對你手頭上嘅貨有興趣。太心急會賣平咗,太貪心又會錯失套現機會。早前中環中心出售,坊間話有一成水位。但係拆售之後,賺三成起碼,證明地產投資,條數唔係個個識計。同樣道理,啟德地盤開售,唔使諗,我話,5萬蚊一呎。

蛋糕真係點賣都得?價錢真係任開?事實如此,因為發展商有強大坐貨同貸款能力,佢賣一件貴價蛋糕,只要你肯買,只要你肯認數,呼吸plan都有,點會賣唔出?地產唔同股票,冇證監會限制孖展,地產商可以借足九成,但股票永無借九成,除非IPO。賣樓嘅發展商唔怕你精,唔怕你呆,最怕你唔愛。而且啟德已經唔再係「港人港地」,未來科技人才大量來港,要買新樓,西九已經賣晒,只有啟德。

你覺得而家樓價好恐怖?將來你仲驚,只有更恐怖。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads