熱門:

2018年3月14日

方卓如 方如玉帥

全部都係建制派

泛民輸咗九西補選議席,其實下屆正式選舉時唔等於可以還原本來嘅議席數量,因為今次輸咗,令到下次正式再選嘅時候,搵唔到理由叫選民投你票。坊間評論話以後要重視地區工作,唔可以再靠單純網上或形象工程。但試問,地區工作泛民幾時可以同建制鬥?地區工作就係蛇齋餅糭,你點夠人派?況且地區工作,要多個巴士站,要搵政府執乾淨垃圾,搵建制議員可能仲有效過搵泛民議員,人哋係同一陣線,點會畀你泛民邀功?

姚松炎嘅做法,原意其實係好正路。DQ受害者,當然係打DQ議題,唔同意DQ嘅自然應該選佢。DQ事件全港都知,街站已經唔再重要,地區工作更加唔係一朝一夕。主打網上同媒體空戰,將DQ問題放大,係佢獨有嘅武器。事實上佢輸2000幾票,係可以贏,空戰如果成功冇人會話佢。只係佢沒有意識到這是一場豪賭,押上DQ晒冷,輸咗就唔單止係一個議席,係斷咗條龍脈,以後沒有任何空戰本錢,大家返去鬥地區工作,鬥地面戰。

何解?DQ變成恒常化,唔再係同仇敵愾嘅議題。真普選,在DQ作篩選嘅程序下,就算明天全面普選,還是否泛民口中嘅真普選?監察政府,而家任何泛民呱呱叫嘅政府議案,有邊條唔係掂行掂過?拉布嘅武功都被廢埋,反對得大聲啲可以視你為不守《基本法》,坐得响大廳入面,個個都要乖乖地唔畀作反,仲唔係全部變成建制派?2016年王光亞已經話泛民屬建制,佢一早預視今日嘅情況,只係議員全屬建制派有不同光譜而已。

政治在香港係冇空間,反而經濟活動就甚有空間。政治窒息嘅地方,係要經濟大開方便之門畀大家透透氣,舒展筋骨。否則,政治又鍊死,經濟又揸住要害,人類係生存唔到,會被迫反抗。再者,要人家配合政治路線,點都要有啲經濟利益,幫阿公做完嘢都要有安家費。

中國未來十年都是強勢統治,冇人夠實力挑戰政權,仁慈嘅獨裁係全世界最有效率嘅制度,加上民營企業都要响國家嘅指導之下運作,中國嘅經濟資源係最集中,最能夠為國家服務。地球上市值最大嘅公司唔係Apple Inc,係China Inc,你要衡量中國嘅經濟實力,唔止係睇佢三萬億美元嘅外滙儲備,係要計埋全部中國企業嘅資產。任何投資落注都唔可以同中國對着幹,否則輸死你,賭人民幣貶值就係活生生嘅例子。中國未來要政治穩定,金融環境就唔可以放得太過寬鬆,否則帶來金融震盪,會影響政治穩定。中國境內唯一金融寬鬆咗嘅地方就係香港,吸收外國資金最佳嘅地方就係香港。未來香港對國家非常有用,但係香港人就並不有用。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads