熱門:

2018年3月14日

麥狄文 金融街密語

A股新交所齊齊搶港交所生意

港交所(00388)有關上市改革「同股不同權」的細節仍未公布,但繼新加坡之後,內地市場已經度緊點樣搶佔新經濟股上A股嘅市場,分分鐘快過港交所。中證監喺今年1月底召開年度工作會議時,已表示今年重點任務係「改革發行上市制度,加大對新經濟的支持力度。」而上月26日,新華社仲發表一篇題目為「中國資本市場的BATJ夢該圓了」文章,文中指出A股曾經遺憾錯失BATJ(百度、阿里巴巴、騰訊及京東),所以要下定決心改革上市制度。

話口未完,A股即展現其改革決心,上月初,富士康旗下公司富士康工業互聯網公司遞交A股上市申請,有關方面僅花36日就通過其A股IPO審批,較一般IPO平均審批時間15個月大大縮減,仲要中間隔咗個春節假期,呢次光速審批震撼內地跟寶島股壇。呢間公司成立不足3年,亦唔符合A股IPO需要至少3年盈利要求,反映今次有關方面為咗全力爭取新經濟股喺A股上市,特事特辦。

喺過去多年,中國嘅新經濟股主要在境外上市,但騰訊(00700)跟阿里巴巴等科網巨企,已由當初寂寂無聞嘅初創企業,發展為國際知名、舉足輕重嘅業內龍頭,市值更以萬億計算,阿爺對於呢啲巨無霸嘅金融話事權拱手讓人已無法再忍受。為咗將新經濟股納入A股,最快方法就係發CDR(中國存託憑證)。

而較早前兩會舉行期間,中證監多位高層,包括騰訊舵手馬化騰在內嘅多位科網巨企掌舵人,紛紛表態支持。而一直準備改革上市制度,吸引更多新經濟股來香港上市嘅港交所,其主要競爭對手之一嘅深交所,已擺明車馬立志成為中國新經濟股主戰場,今年內可推出CDR迎戰。

之前阿Man講過港交所要吸引新經濟股嚟港股上市,其中一個主要任務,係代表阿爺同山姆叔叔拗手瓜,喺各國央行閂水喉之前,鬥快搶全球資金池,但如今阿爺已默許深交所搶埋一份,港交所本來有嘅優勢,似乎已大減。加上之前阿Man亦提過,港交所人手不足問題嚴重,審批上市工作積壓如山,但A股竟然以36日「光速」特批富士康工業互聯網上市,呢鋪真係響晒警鐘。

星擬放寬「雙重股權架構」

目前除咗騰訊之外,內地主要科網巨企均雲集花旗國,當中最大五間公司為阿里巴巴、百度、京東、網易、微博,市值合計約5.4萬億港元,每日成交額超過500億港元,單係呢五大股份成交額,已幾乎佔去近日港股日均成交額一半。港交所雖已計劃邀請呢五大巨無霸在港股第二上市,一旦內地搶發CDR,被截糊機會可想像有幾大。

日後若然更多新經濟股以CDR形式喺內地交易,本來期望港股成交激增或好夢成空,對港交所股價並非正面消息。除了內地股市搶埋一份,最弊係家陣連新加坡交易所,喺爭取新股上市方面競爭升溫,獅城舊年已提出有意容許「雙重股權架構」公司上市,噚日來自通訊社消息話,新交所擬放寬對「雙重股權架構」的部分要求,包括最低市值要求等,而有關公司需要在主板掛牌嘅要求亦有意取消,擺明又係為咗爭取更多中國新經濟公司到當地上市。

面對內憂外患,未知小加同志有何對策,較早前百度掌舵人李彥宏喺兩個期間接受訪問,已表示百度喺花旗國上市,早已經實現AB股架構,到香港上市可以話必要性唔大,未知小加同志聽完呢番說話會否一額汗。本以為遷就喺花旗國上市嘅內地科網巨企,放棄之前企硬嘅「同股不同權」限制,可惜對象唔領情更表示無興趣,加上內地A股快人一步,理想達到,港交所如要重奪今年全球交易所IPO集資額一哥寶座,睇嚟要加把勁。

麥狄文(徐狄怡.證監會持牌人)

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads