熱門:

2018年1月15日

高仁 財圈識真假

沽空機構風光似不再

上文提要:2017年,沽空機構空群而出狙擊本港上市公司,年內刊發的沽空報告數量更是歷年之冠;其中,西藏水資源(01115)更身陷「冰火兩重天」。各位「巴打」,「豬朋狗友」程更計和施友化聽到「冰火」之後,兩人立刻興奮地邀約高仁一起飯局,推說是要討論沽空機構似乎風光不再的原因。

在披露對話實錄之前,請各位「巴打」重溫人物背景,簡介如下:

程更計──本地證券行經紀兼財務顧問,除了招呼散戶之外,亦向上市公司出謀獻計;

施友化──擁有公司私有化經驗的前「唉賓」,被看中轉型為上市公司CFO。

高 仁:喂!你哋兩個做乜咁好約我出嚟食飯?

施友化:咪係因為你上星期嗰篇「冰火」文章囉!

程更計:嘻嘻……你篇文章嘅題目咁抵死啜核,一直搞到我心癢癢兼坐立不安,想快啲知埋個下集大結局。

高 仁:雖然西藏水資源以一敵二,但都可以好似葉問師傅咁「一個打十個」勝出,一方面如沽空機構始祖渾水研究(Muddy Waters)創辦人所講,有北水湧港幫手托價;另一方面,就係上市公司老闆已經搵到不同方法去應對。

恒大老闆廣結人緣

程更計:係呀!我哋就想知道,究竟上市公司有乜嘢好方法,可以令到舊年沽空機構頻頻失手。

施友化:不如講中國恒大(03333)嘅case先,香櫞研究(Citron Research)可以算係最羞家,不但被證監會指涉嫌發布虛假訊息同誤導投資者,兼且被罰禁止買賣港股5年。

高 仁:各位「巴打」應該都知道,恒大老闆許家印已榮登中國首富,佢本身同中港兩地富豪相當熟落,據聞之前仲組成咗「鋤Dee會」,核心成員包括彤叔、大劉、「重慶首富」張松橋等等。佢哋friend過打band,好多時候做事,大家都會「齊上齊落」。

程更計:係啦!恒大呢一年股價好似坐咗火箭咁,如果有幫手買貨擊退沽空,可以做到有錢齊齊搵喎。

狙擊瑞聲理據薄弱

施友化:我有興趣嘅係第二個case,自稱「蝙蝠俠」的葛咸城研究(Gotham City Research)竟然夠膽狙擊藍籌新貴瑞聲科技(02018)。

高 仁:哈!哈!「蝙蝠俠」絕對係一個失敗case,連「行家」匿名分析(Anonymous Analytics)都睇唔過眼,要變身「超人」還擊。「蝙蝠俠」最大問題係其理據薄弱,指控瑞聲使用未披露關連人士公司隱藏成本,但其實非重大附屬交易係可以獲得豁免(高仁註:詳見2017年6月〈匿名超人反擊蝙蝠俠〉文章)。

程更計:唉……瑞聲股價跌得嗰幾日,之後就「開車」絕塵而去,想追都追唔到。

施友化:最後,可唔可以講埋敏華控股(01999)被狙擊翻身之作呢?

高 仁:No problem。沽空機構揀選狙擊目標,一般都係搵股價升、估值高嘅股票,或者老闆抵押股票借錢之類。今次渾水好明顯係搵錯咗對象,原因是老闆係比較有錢,有能力買番轉頭,挾空倉都挾死。

程更計:呵呵!果然係絕呀!

各位「巴打」,除了沽空機構之外,去年哪一個人的行動值得回顧呢?下周,高仁帶各位「巴打」看看股壇「哥哥」不羈之作。

本欄逢周一刊出

如想與高仁交流上市公司的財技個案及招數,請電郵至 [email protected]

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads